Dezafiu seluk, maski Governu monu tutuir dalan maibé sempre hasai osan barak husi Fundu Minarai kada tinan maibé la lori benefísiu ba povu.

Tanba ne’e, Xefe Estadu husu presiza tetu klean kona-ba osan ne’ebé hasai tinan-tinan husi Fundu Minarai no gasta oinsá. 

“.......Presiza tetu klean kona-ba osan ne’ebé ita hasai tinan-tinan husi Fundu Minarai no gasta oinsá. Iha hahalok ruma ne’ebé gasta osan barak maibé lalori benefísiu ba povu. Ha’u husik hela hanoin klean ne’e ba ita hotu, iha loron ohin, liuliu ba ukun-nain sira, iha tinan sanulu resin ualo nia laran,”PR Lú-Olo hato’o preokupasaun ne’e liu husi nia mensajen nasionál ba aniversariu Restaurasaun Independénsia Timor-Leste ba dala-XVIII, Kuarta (20/5), iha Palasiu Prezidensial Bairu-Pite Dili.

PR Lú-Olo afirma, tinan ida ne’e hahú kedas ho problema ne’ebé afeta mandatu VIII Governu.

Governu ne’ebé harii ho maioria parlamentar mai husi aliansa partidu tolu, CNRT, PLP no KHUNTO,  ne’ebé manán eleisaun antesipada, iha 12 maiu 2018.

Nia esplika, maski maioria parlamentar maibé la bele garante estabilidade governativa, mosu husi maioria ne’e duni hahalok ida ne’ebé hatudu relasaun frájil ida katak, relasaun ne’e la metin entre sira. Tanba  Orsamentu Jerál Estadu 2020 la pasa iha Parlamentu Nasional, situasaun foun ida ne’e komplika Estadu tomak ninia funsionamentu no afeta mós povu nia moris.

“Ita selebra ohin, 20 de Maiu 2020, Loron Restaurasaun Independénsia Timor-Leste ba dala sanulu-resin-ualu. Tanba ita sei tuir hela Estadu Emerjénsia, Governu propoin ba ha’u nu’udar Prezidente Repúblika atu fó hanoin data istórika ne’e, liu de’ it husi mensájen ida ba povu, tanba ne’e ha’u simu proposta ne’e, ho haksolok, nu’ udar medida Estadu Emerjénsia atu proteje nafatin povu Timor-Leste husi moras surtu Covid-19,”PR Lú-Olo espresa sentimentu haksolok.