Komandante Jerál PNTL, Komisariu Faustino da Costa hatete, polisia hala’o ona sosializaun ba komunidade sira atu kumpre estadu emerjénsia, maibé komunidade seidauk iha disiplina no konsiensia rasik atu kumpri.

“Timor ne’e hatene hotu lei be…loja sira ne’e O ba karik, sira dehan ami kaer hela lei ida ne’e, dala ruma mós ita influensia katak keta ita kuñese ema boot balun, lider balun, entaun lori ida katak ida ne’e mak loos hodi viola regras estadu emerjénsia,”dehan Komandante Faustino ba jornalista sira hafoin halo sorumutu ho Komandu F-FDTL, iha salaun inkontru F-FDTL Kuartél Jenerál, Fatuhada-Dili (07/04).

Iha sorumutu ne’e, Komandu na’in rua (Komandu F-FDTL ho Komandu PNTL) ko’alia kona-ba progresu implementasaun regras Estadu Emerjénsia durante ne’e ba komunidade.

Komandante Faustino hatete, PNTL sei implementa regras ho rigoroju liu husi asaun pasa revista ba kareta privadu sira hodi haree ema sira iha kareta laran no merkadu sira ne’ebé fa’an sasan la kumpri distansia sosiál.

“Ami orienta komandante sira iha kraik, katak ita labele halimar ona ho situasaun ida ne’e,”dehan nia.

Tanbá ne’e, komandu sei realiza inkontru ho komandante munisipiu sira, hodi fó fali orientasaun ida hodi labele permite situasaun sira ne’e akontese tan.

Alende ne’e, Unidade Polísia Fronteira (UPF) mós nafatin asegura liña fronteira sira, inklui asegura dalan ilegal sira ne’ebe sidadaun illegal tenta tama.