×

Atenção

JUser: :_load: Não foi possível carregar usuário com ID: 430

Print this page

PNTL Monta CCTV 75 iha Dili Featured

By Fevereiru 24, 2017 3018
Kamera CCTV monta iha kapital Dili Kamera CCTV monta iha kapital Dili

DILI: Kontrolu ba rodoviariu iha Dili laran, Polisia Nasionál Timor-Leste (PNTL) monta ona kamera Closed Circuit Television (CCTV) hamutuk 75 iha Dili laran.

CCTV hirak ne’e monta iha fatin-fatin ne’ebé risku ba asidente tráfegu no área engarrafamentu.

Montajen kamera ne’e nu’udar meiu ida atu deteta asidente tráfegu no mós krime iha fatin-fatin públiku.

Ministru Interiór, Longuinhos Monteiro dehan, dala barak asidente tráfegu akontese iha kalan boot, maibé labele deteta tanba falta prezensa PNTL. Ne’e duni, ho prezensa kamera CCTV hodi akapta no grava akontesimentu sira.

“Kamera ne’e rasik ajuda ita nia Polisia sira hodi orienta sira nia atividade iha terrenu,” dehan nia, iha diskursu, iha Kuartél Jerál PNTL, horisehik.

Kamera ne’e hetan apoiu husi nasaun Xina. Hodi hasa’e vijilánsia iha área seguransa nian hodi kombate kazu krime iha fatin públiku.

Iha fatin hanesan, Komandu Jerál PNTL, Komisáriu Júlio da Costa Hornay hateten, CCTV sai vantajen hodi bele hetan imajen para kontrolu situasaun hanesan na’ok no asaltu ba sidadaun sira.

Nia hatutan, iha situasaun períodu kampaña nia laran ho prezensa kamera bele ajuda monitoriza kriminalidade iha Dili laran.

Aleinde ne’e, Komandu PNTL mós husu atu monta mós kamera CCTV iha área aeroportu, portu no fronteira terrestres hodi bele monitoriza atividade movimentasaun iha fatin hirak ne’e.

Entretantu, Segundu Komandu PNTL Munisípiu Dili, Superintendente Asistente Euclides Belo dehan, prezensa kamera CCTV nian atu apoiu servisu PNTL nian hodi kontrola situasaun iha Kapitál Dili.

Tanba ne’e, ho kamera CCTV maka iha hodi deteta infratór no suspeitu sira ne’ebé gosta halo kontra sinais tránzitu bainhira halai lakon.

Kamera ne’e la'ós implementa de’it ba komunidade sira, maibé mós ba membru PNTL ne’ebé kontra sinais tránzitu, komandu sei foti medida forte hasoru sira.

Monta kamera CCTV ne’e, PNTL sei garante estabilidade pás iha Dili laran atu labele iha kazu ruma, bainhira se de'it maka envolve kazu kamera CCTV akapta hodi kaptura halo investigasaun ba aktus sira ne’e. 

Rate this item
(0 votes)
Jacinto Xavier

Latest from Jacinto Xavier