PNTL Hapara Asaun Kontra Sosa Karreta ba Deputadu Featured

By Ekipa INDEPENDENTE Outubru 02, 2019 4201
kareta deputadu sira kareta deputadu sira

DILI: Komando Polísia Nasionál Timor Leste (PNTL) Munisípiu Dili hapara asaun Movimentu Universitariu Timor Leste (MUTL) no Klibur Estudante Progresivu (KEP) ne’ebé hato’o protesta relasiona ho sosa karreta foun ba deputadu sira.

Tuir observasaun Jornalista INDEPENDENTE, iha Segunda (30/09) tuku 9:30 dader manifestante sira hahú dada espanduk iha kampus sentral Universidade Nasionál Timor Lorosa’e (UNTL).

Manifestante kuaze na’in 100 resin hahú hakilar “abaixu deputadu kanten”. Abaixu deputadu matan prado”. “Sai reprezentante povu labele bidu iha povu nia terus leten”.

Manifestante sira mós toka no hananu muzika rejistensia nian hanesan jestu ida hodi motiva sira sai brani liu tán hodi kontra injustisa sosial ne’ebé la’o iha rai laran.

Bainhira atu tama ba tuku 10:00, polísia Unidade Taks Force no BOB hakat ba fatin konsentrasaun MUTL nian no hahú halo konversa. Maibé, parte rua la konvense malu nune’e polisia deside hodi hatun hotu espanduk sira ne’ebé tara hela.

Haree ba asaun polisia ne’e, manifestante sira mós tenta hada’u espanduk sira ne’ebé polisia obrigatoriamente hasai. Maske nune’e, la konsege mosu asaun anarkizmu.

Portavoz MUTL Mailaka Junior, konsidera atuasaun, PNTL hanesan asalta manifestante sira ho dezumanu.

Nia dehan, molok ne’e MUTL iha ona akordu ho PNTL Munisípiu Dili ne’ebé hatun ona despaisu iha loron 30/9 hodi autoriza atu halo asaun.

“Ami seiduak kontra ka halo krime ida ba batalla ida ne’e, bazeia ba karta ne’ebé ami hato’o ba komandu jeral ne’ebé asina husi komandu jerál hatun despaixu katak ami bele halo asaun iha loron ohin, 30 Setembru,” informa nia.

Manifestasaun La Prense Rekezitus

Entretantu, Komandante PNTL Dili Superintendente Xefe Armando Monteiro hatete, iha semana ida liu MUTL ho KEP haruka duni karta ida mai iha komandu.

Maibé, nia dehan, organizasaun estudante ne’e nia estatutu la klaru.

“Ita koalia kona-ba Klibur Estudante Progresivu, KEP, tanba organizasaun estudante ida ne’e nia estatutu la eziste. Segundu sira-nia karta ne’ebé mak dirize mai ita-nia komandu sira la prense rekejitus,” deklara Armando ba jornalista sira iha knaar fatin, Kaikoli, horseik.

Tanba la priense rekejitu, nia informa, iha Sesta (27/09), nia parte bolu ona reprezentante husi manifestante sira na’in tolu hodi husu atu sira aprezenta repedidu foun, maibé to’o agora sira seidauk aprezenta. Ho razaun ne’e, Komando PNTL Dili deside hodi hapara.

“Atividade saida de’it atu hala’o iha kapital Dili tenke tuir lei, tanba liberdade reuniaun demokratiku ida ne’e mós iha lei ida regula hela ita-nia liberdade,” nia hatete.

Nia esplika, bainhira manifestante sira halo ona mudansa ba pedidu, PNTL prontu atu fó apoiu seguransa ba sira-nia atividade.

Rate this item
(0 votes)

Independente Digital TV