Print this page
HIV/SIDA HIV/SIDA

Pasiente HIV/SIDA 211 ‘Halai Lakon’ Featured

DILI: Ministériu Saúde identifika ona ema hamutuk na’in 211 ne’ebé moris ho HIV/SIDA halai lakon ka la halo tratamentu saúde.

Tuir dadus ne’ebé iha, ema na’in 500-resin mak hetan ona moras HIV/SIDA, maibé husi númeru ne’e foin na’in 249 mak halo tratamentu saúde. Nune’e, pasiente na’in 211 seluk durante ne’e la halo tratamentu.

Ne’e duni, ministériu saúde kooperasaun ho Komisaun Nasionál kombate HIV/SIDA no mós parseiru organizasaun sira seluk sei buka no identifika tuir hodi pasiente hodi ba tuir tratamentu saúde.

Diretora Jerál Prestasaun Servisu, Ministériu Saúde (MS), Odete Viegas hateten, papél ministériu saúde nia oinsá haforsa liu husi parseiru servisu hamutuk ho KNKS no organizasaun sira atu bele halo promosaun saúde hodi fó koñesimentu ba komunidade oinsá atu bele identifika no oinsá atu bele halo tratamentu ba pasiente moris ho HIV/SIDA.

Nia hatutan, polítika ministériu saúde nia oinsá atu asegura saúde ba ema hotu-hotu iha Timor laran tomak atu moris saudavel, inklui parte ida maka hetan ona HIV/SIDA.

“Komesa ba oin esforsu makaas liután hodi identifika oinsá halo tratamentu ba ema ne'ebé afeta ba HIV/SIDA,” tenik nia.

Tanba ne’e, nia husu, labele halo diskriminasaun sira ne'ebé moris ho HIV/SIDA.

Formasaun Antes Implementa Kurríkulu HIV/SIDA

Ministru Edukasaun, António da Conceição hateten, ministériu presiza sei fó informasaun ba profesór sira antes matéria HIV/SIDA implementa iha kurríkulu ensinu sekundária atu labele hanorin sala.

Matéria ida ba eskola sekundária hanesan biolojia no ida ne’e sei tau iha kalendáriu edukasaun nian.

“Ha’u mós ko'alia ona ho primeiru ministru atu implementa matéria HIV ne’e ba iha kurríkulu ida ne’e mós konkorda ona no introdús ona iha matéria biolojia ninian,” dehan António, iha edifísiu KNKS, Praia Kokeiros, horisehik.

Tanba ne’e, iha posibilidade atu integra matéria HIV/SIDA nian iha kurríkulu ensinu, liu-liu matéria biolojia ne'ebé atu hanorin.

Tanba ne’e matéria ne'ebé konstrui ona parte ida bele iha matéria ida biolojia nian, maibé iha parte siénsia relijiozu mós buat ne'ebé parte no ligasaun ho matéria HIV/SIDA .

Ne’e duni, ministériu edukasaun husu ba KNKS atu bele fahe informasaun ba eskola sekundária sira iha territóriu Timor atu bele komprende di’ak liután kona-ba virus HIV/SIDA.

Iha fatin hanesan, Sekretáriu Ezekutivu KNKS, Daniel Marçal hatete, ME komesa fasilita ona matéria HIV/SIDA kona-ba kurríkulu, tanba ne’e importante tebes ba estudante hodi komprende liu tan kona-ba virus ne’e.  

Read 742 times
Rate this item
(1 Vote)

About Author

Latest from Veronica Meles