Print this page

Parlamentu Nasional Mantein Sosa Prado Foun Featured

By INDEPENDENTE Agostu 16, 2017 2692
Presidente Parlamentu Nasional Presidente Parlamentu Nasional

DILI: Parlamentu Nasionál mantein sosa karreta Prado foun hamutuk 65 ba deputadu IV Lejizlatura, tanba iha diskusaun Orsamentu Jerál Estadu (OJE) 2016 ne’ebé prevé verba orsamentu ida ne’e, hetan ona aprovasaun.

Polítika ne’e Parlamentu Nasionál foti tanba lakohi fó risku ba OJE. Kuandu deputadu foun sira kontinua uza Prado tuan, iha futuru bele hasai osan barak hodi halo manutensaun.

Prezidente Parlamentu Nasionál, Adérito Hugo da Costa hatete, opiniaun públiku ne’e sempre respeitu, maibé desizaun hotu iha ona. Orsamentu prevé ona ba aprovizionamentu atu bele halo prosesu.

Nia esplika, proposta orsamentu atu sosa karreta Prado foun, dezde inisiu halo diskusaun iha OJE 2016 prevé ona. Tanba ne’e, atu sosa Prado foun la'ós ona buat foun ba públiku. Kada períodu parlamentu nasionál sempre sosa karreta ba deputadu foun sira.

“Ne’e desizaun koletivu husi lider bankada haat iha parlamentu nasionál”, dehan Adérito, iha Uma Fukun PN, horisehik.

Nia hatutan, atu garante transparénsia no kontabilidade, PN dezde inisiu kuandu halo diskusaun ba OJE abertamente no husi komisaun mós halo audiénsia ho entidade públiku relasiona ho transferénsia orsamentu sosa karreta ne’e.

Nia hatutan, jestaun ba orsamentu mak ne’e internál instituisaun ida-idak nian oinsá atu halo planu ba despeza operasionalizasaun ba instituisaun ne’e nian.

Nia hatutan, karreta Prado tuan sira ne’e sei la lori ba iha parte patrimóniu Estadu atu halo prosesu ba leilaun, tanba iha regra parlamentu bele devolve nia autonomia administrativa finanseira halo rasik jestaun ba knaar ne'ebé iha.

Nia hatutan, orsamentu sira ne’e prevé hotu ona, agora atu halo ezekusaun orsamentu hodi ba sosa karreta ho presu US$ 45.000.

Nia hatutan, atu haree ba despeza karreta ida kuandu hetan dezastre, nia kustu manutensaun liu US$ 20.000. Tanba ne’e, instituisaun ne’e hakarak halo jestaun oinsá halo despeza Estadu ba anuál nian inklui ba manutensaun karreta nian.

“Karreta nia kilu-metrajen tama ona ba 80.000, 110.000 no 120.000 ne’e ita fó nafatin ba deputadu foun sira atu uza ba operasionál ita sei gasta osan boot ba manutensaun”, dehan Adérito.

Nia hatutan, prosesu sira ne’e membru parlamentu nasionál 65 ne’e halo hotu analizasaun hodi deside hatama karreta foun. Kuandu husik karreta 65 ne’e nafatin, entaun osan hira mak tenke hasai hodi halo manutensaun.

Rate this item
(0 votes)