Funu ba libertasaun ita liu tiha, dezafiu no obstaklu kontinua dezafia funu na’in no lider sira atu liberta povu husi ki’ak no mukit.
Hanesan mós lider istoriku ida Fransisco Guterres (Lu-Olo) ho nia simplisidade ne’ebé eleitu ba Presidente Repúblika.
Too ona tempu povu kongratula no fó parabeins ba Lu-Olo, hanesan jerasaun tuan sei kontinua dedika nia ba oinsa atu liberta povu husi ki’ak no mukit.
Iha diario INDEPENDENTE nia intrevista, populasaun no estudante fó parabeins no kongratula ba Prezidente Repúblika eleitu.
Estudante UNTL Teresa De Araújo Kongratula Lu-Olo tanba hetan konfiansa maioria husi povu atu sai aman ba povu no nasaun Timor-Leste.
“Ha'u kongratula ba prezidente eleitu Lu-Olo ne’ebé povu fó konfiansa atu kaer pasta Prezidente da Repúblika iha períodu tinan lima”, dehan nia ba INDEPEDENTE iha Kaikoli-Dili,horisehik. Lu-Olo Nu’udar Luta na'in, estudante ne’e garante Lu-Olo sei sai prezidente hodi hamutuk ho governu bele dezenvolve TL atu hasai povu husi kiak no mukit.
Diretór Ezekutivu Fundasaun Mahein Nelson Belo mós Kongratula ba Prezidente Eleitu ne’ebé hetan konfiansa liu husi votu sekretu timor-Oan tomak nian.
“Ha'u kongratula ba Lu-Olo nu'udar kandidatura eleitu ba Prezidente Repúblika iha Períodu ne’e”, dehan nia.
Nelson dehan, Fundasaun Mahein prontu apoiu Prezidente Eleitu Francisco Guterres ‘Lu-Olo’ liu husi informasaun iha área seguransa no defeza nian.
FM Fiar , Prezidente Eleitu Francisco Guterres Lu-Olo koopera ho governu estabelese lalais polítika seguransa nasionál atu define loloos seguransa interna no esterna nian.
