“Ita nia sistema mak sei uza manuál. Momentu ne’e fiu mak kanek uitoan la posivel ita identifika haree ho matan, maibé so kalan mak sira lori kamera foin hetan”, dehan nia, iha Edifísiu Ministériu Finansas, Ai-Tarak Laran, horisehik.
Nune’e, iha tinan 2018, liu husi fundu emprestimu, Governu prepara sistema dijitalizasaun. Proposta aprezenta ona ba Konsellu Ministru atu bele implementa iha 2020.
Nia dehan, seidauk iha melloramentu planu atendimentu ba kliente sira tanba sei kontinua uza sistema manuál.
Maibé, oras ne’e iha ona faze preparasaun hodi konsolida liña-ministeriál sira atu apoiu hodi hadi’a sistema ne’e. Tanba ne’e, tenke kuida haree ba risku bainhira to’o tempu atu implementa planu, bele identifika ona no iha kualidade ba Timor-Leste.
Antes ne’e, Vise-Ministru Obras Públiku (MOP), Nicolau Lino Freitas Belo hateten, durante ne’e eletrisidade iha Dili laran mate tanba halo hela manutensaun ba tranzmisaun liña eletrisidade iha Dili laran.
Nia dehan, ahi durante ne’e dala ruma mate lakan tanba laiha manutensaun rotina. Maski nune’e, governu kontinua esforsu hodi bele hadi'a hotu problema hirak ne’ebé durante ne’e akontese hodi minimiza ahi mate-lakan.
Durante ne’e tinan rua ona laiha manutensaun ba eletrisidade ba laiha orsamentu hodi halo pagamentu, maibé agora daudaun kontrata ona kompañia hodi bele halo servisu ne’e. Falta manutensaun iha tempu barak nia laran bele hamosu transformadór rebenta tanba mosu koneksaun ilegál barak.
Ne’e duni, Governu kontinua esforsu hodi halo korte ba komunidade sira ne’ebé halo ligasaun ahi ilegál.
Tékniku EDTL Kontinua Korte Ligasaun Ilegál Entretantu, husi parte EDTL rasik, iha loron (7/8) hasai avizu ba públiku katak, tékniku EDTL kontinua hala'o inspesaun iha área Surikmas hodi korte ka tesi kliente EDTL ne'ebé dada enerjia eletrisidade ho ilegál ka direita.
Ba konsumidór sira ne'ebé iha ona kontadór prepagu maibé kontinua halo ligasaun direita ka ilegál mak tékniku EDTL sei tesi no husu multa ba kliente ne’e.
EDTL mós husu ba kliente sira ne'ebé seidauk uza kontadór prepagu ka rejistu iha EDTL liuliu iha kapitál Dili bele hakat ba edifísiu sentrál EDTL nian iha Kaikoli hodi rejistu foun. Kritériu ba rejistu mak lori ho kartaun eleitorál no osan Dollar Amerikanu tolu nolu resin lima, lima nulu sentavus (USD $35.50).