Print this page

MJ sei Investiga Funsionáriu Fasilita BI no Pasaporte ba Ema Estranjeiru Featured

By Pedro Alves Fevereiru 21, 2020 2179
Passaporte estranjeiru nakfila ba passaporte timor Passaporte estranjeiru nakfila ba passaporte timor

DILI: Ministru Justisa (MJ), Manuel Cárceres hala’o ona despaxu atu investiga funsionáriu balun iha Diresaun Nasionál Rejistu Notariadu (DNRN) ne’ebé fasilita pasaporte no billete identidade (BI) ba sidadaun estranjeiru balun.

Nia dehan, Ministériu Justisa hakarak halo investigasaun tanba ema estranjeiru barak mai reklama riku-soin iha Timor lori kaer pasaporte no billete identidade timorense ne’ebé , tuir Lei loloos sira labele atu hetan.

“Sei iha prosesu investigasaun atu nune'e bele forte atu ministru bele foti desizaun”, dehan Manuel, iha Palasiu Governu, horisehik.

Nia dehan, hanesan ministru anula ba pasaporte ba sidadaun estranjeiru balun tanba la'ós nasionalidade timoroan.

“Ha’u anula ona maluk estranjeiru barak kaer pasaporte Timor. Ha’u dehan lae, hasai nia pasaporte no billete identidade, tanba nia la'ós nasionalidade timoroan, tanba atu sai sidadaun timoroan tenke liuhusi pedidu naturalizasaun, labele nia moris iha Austrália no Portugál, mai sai timoroan loloos, ne’e labele”, tenik nia.

Entretantu, konfirma kona-ba sidadaun estranjeiru hirak mak governante ne’e halo anula, nia la sita númeru kompletu tanba la fiksa detalla.

“Semana oin sei anula tan balun tanba iha nakar-teen balun, maibé ema la sala tanba ita mak fó. Maibé oras ne’e investigasaun la’o hela”, tenik nia.

Alende ne’e, governante ne’e informa kona-ba ministériu justisa atu monta sistema pasaporte iha munisípiu haat no sei planeia atu kria mós iha munisípiu neen hodi fasilita sidadaun sira.

Rate this item
(0 votes)