Membru F-FDTL Ida Kustupadu ho Isin Manas Hafoin Fila Husi Wuhan-Xina Featured

By Ekipa INDEPENDENTE Janeiru 30, 2020 4364
Ilustrasaun foto:Mmembru F-FDTL. Foto INDEPENDENTE Ilustrasaun foto:Mmembru F-FDTL. Foto INDEPENDENTE

DILI: Ospitál Nasionál Guido Valadares (HNGV) izola membru FALINTIL-Forsa Defeza Timor-Leste (F-FDTL) ida, tanba hetan kustupasaun ho isin manas hafoin fila husi Wuhan, Xina.

Tuir deklarasaun membru forsa ne'e, nia foin fila husi formasaun iha Wuhan-Xina, iha loron 19 Janeiru 2020. 

Membru F-FDTL ne'e ba konsulta iha HNGV, iha Kuarta (29/1), ho kondisaun kustupasaun no isin manas hanesan ho sintoma balun husi pasiente hetan Virus Corona.

Nune'e, parte HNGV halo ona izolamentu ba pasiente ne'e hodi hein prosesu teste ne'ebé sei halo iha tempu besik nia-laran.

Bainhira husu informasaun ba mediku sira lakohi fo informasaun detalladu tanba seidauk iha rezultadu teste ba pasiente ne'e rasik.

Antes ne'e, Ministériu Saúde (MS) husu ba Ministériu Defeza no Seguransa (MDS) atu izola ninia membru sira ne'ebé foin fila husi Xina iha semana kotuk, atu mediku sira bele konsulta.

Tuir informasaun, membru ida husi MDS foin fila husi Xina iha semana kotuk hafoin ba tuir formasaun ida iha neebá.

“Ministériu Saúde sei kontaktu ba Ministériu Defesa atu halo detesaun ba membru ida ba tuir formasaun iha Xina foin fila iha semana kotuk nee, tanba nee sei periksa nia hodi bele hatene,” informa Vise Ministru Asuntu Dezenvolvimentu Estratéjiku Saúde Bonifácio Maukoli dos Reis, foin lalais ne'e.

Rate this item
(0 votes)

Independente Digital TV