“Ha'u hakarak fó parabéns ba Jornál INDEPENDENTE ho nia ema hotu, ne'ebé ha'u dezeja katak ita boot sira nia knaar Jornál INDEPENDENTE ho Jornalista sira hotu nia knaar bele lori nafatin ba oin halo kobertura no fo informasaun nafatin ba públiku,” dehan nia, hafoin remata misa agradesimentu iha Igreja Katedrál-Dili, Sábadu (1/4).

Eis Prezidente Parlamentu Nasionál dehan, jornál ne'ebé durante ne’e publika ka divulga atividade Estadu no Governu ba públiku hodi tomak bele hatene saida mak durante ne’e órgaun soberanu ninia servisu.

Xefe Estadu ba períodu 2017-2022 husu atu Jornál INDEPENDENTE divulga nafatin informasaun tuir lia loos atu atu públiku bele hatene di'ak liu tan situasaun iha rai laran.

Ne’e duni, Lú-Olo husu ba Jornál INDEPENDENTE atu iha futuru hadi’a nafatin hakerek ne'ebé loos no justu tuir padraun servisu jornalizmu ninian.

Kritika husi Média Atu Fanu PNTL

Komandante Jerál Polisia Nasionál Timor-Leste (PNTL), Komisáriu Júlio Hornai hateten, durante ezisténsia Jornál INDEPENDENTE iha tinan ne’e nia laran hodi halo kobertura kona-ba área seguransa nian, dala ruma publika informasaun krítiku hodi fanu instituisaun polisia.

Komisáriu Júlio espera katak iha futuru oin mai Jornál INDEPENDENTE sei la’o di'ak liután.

Husu ba jornál ne’e atu iha futuru tenke hadi'a notísia ho kualidade bazeia ba realidade progresu iha dezenvolvimentu iha nasaun ne’e nian.

“Kritika ne’ebé mai husi média ho sosiedade sivíl sira atu hadi'a instituisaun PNTL”, dehan nia.

Komisáriu PNTL afirma, ho kritika sira ne’e sai domin ba PNTL hodi fanu instituisaun ne’e sai progresivu liután.