“Ha’u-nia mandatu ne’e extende ba-mai de’it. Mandatu ne’e bele hotu ohin ka aban ne’e la problema, maibé problema ne’e estabilidade, kuandu forsa armada estavel ne’e nasaun mós estavel ona,” dehan Lere hafoin hasoru-malu ho Prezidente Repúblika Francisco Guterres Lu Olo iha palasiu Prezidensiál, Bairru-Pité, Kuarta (10/07).

Nia hateten, iha nasaun ida moralmente politiku-nain sira bele oho ema maibé fijikamente forsa armada mak bele oho ema no bainhira nasaun la estavel país seluk bele aproveita forsa armada hodi hatutan sira-nia politika.

Hanesan veteranu ida, Lere mós sente katak nia idade la’o daudaun ona no nia hakarak atu tau-matan de’it ba nia familia.

“Ha’u-nia oan primeru foin mak halo tinan 17 entaun presiza atu haree sira,” dehan nia.

Maibé, Lere dehan, bainhira nia laiha ona iha instituisaun F-FDTL no mosu problema, nia labele halo ona buat ida.

“Ba ha’u ohin ka aban sai ne’e prontu tanba ha’u-nia idade mak ne’e ona, ami na’in hira ne’e la’os joven, ita funu atu halokon funu maibé funu hotu ita fahe malu nafatin entaun funu ne’e laiha sentidu, ha’u kuadu iha li’ur ona ne’e ha’u labele halo buat ida ona, bainhira joven mesak ema intelektual mak kaer instituisaun ne’e buat ruma akontese, ami iha li’ur halerik de’it ona hodi hatete tanba saida buat ne’e sai hanesan,” dehan nia.

Hanesan informasaun, iha 6 Outubur 2011, Lere Anan Timur hetan promosaun sai Maijor Jeneral, Xefe Estadu Maior FALINTIL Forsa Defeza Timor Leste (F-FDTL) husi Prezidente Repúblika José Ramos Horta.

Iha Outubru 2016 bainhira nia mandatu remata, Prezidente Repúblika Taur Matan Ruak ne’ebé fofoun “hakarak” troka Lere konkorda hodi extende mandatu Xefe Estadu Maior FALINTIL Forsa Defeza Timor Leste (F-FDTL) Maijor Jeneral Lere Anan Timur to’o tinan 2017.

Iha Outubru 2017, hafoin Prezidente Repúblika Francisco Guterres Lu Olo simu pose, Xefe Estadu ne’e deside hodi extende tan mandatu Lere nian ba tinan 2018.

Ikus mai, iha Outubru 2018, PR Lu Olo deside tan hodi extende mandatu Lere nian ba tinan rua (2), husi 2019 to’o 2020.

Molok ne’e Ministru Defeza no Seguransa ne’ebé nu’udar eis Vise Xefe Estadu Maior F-FDTL, Filomeno Paixão deklara desizaun Prezidente Repúblika hodi extende mandatu Maijor Jeneral Lere loloos kontra estatutu Forsa Armada.

Tanba, Ministru ne’e esplika, iha estatutu Forsa Armadas hatete minimu idade tinan 62 tenke reforma ona husi vida militar. Daudauk ne’e Maijor Jeneral Lere atinze ona idade tinan 67.

“Ha’u labele dehan konkorda. Desizaun Prezidente (Repúblika) foti ona ita koalia hanusa, ne’e hanesan desizaun politika, estatutu militar mós la fó dalan mak ohin ha’u dehan liu tiha (idade) 62 hotu ona, maibé Prezidente keta tetu karik hare’e ba jerasaun foun, tetu mós ba situasaun seidauk metin, buat hirak ne’e hakarak tau nafatin veteranus mak kaer,” dehan Ministru iha salaun Ministeriu Finansas, Aitarak Laran, Dili, Kinta (27/06).

Ministru ne’e mós komenta kona-ba desizaun ne’ebé Taur Matan Ruak bainhira sei sai nu’udar Prezidente Repúblika foti hodi extende Maijen Lere ho nia rasik ne’ebé iha momentu ne’ebá assume kargu nu’udar Vise Xefe Estadu Maior F-FDTL.

“Iha tempu ne’eba ha’u sala tanba la tuir lei, tanba lei dehan 62 anos masimu ami tanke sai ona, maibé naton foti ami ne’e liu 62 anos, maibé foti ami. Agora Jeneral Lere mós 66 ka 67 nafatin foti, ne’ebe ita sala, foti desizaun sala hela de’it,” dehan eis Brigadeiru Jeneral ne’e.