Komunidade Labele Kontente ho Númeru Covid-19 Tun Featured

By Domingos Gomes Maiu 12, 2020 2868
Atualizasaun Covid-19 Atualizasaun Covid-19

DILI: Komandu Polisia Nasionál Timor-Leste (PNTL) Munisípiu Dili husu ba komunidade sira atu labele kontente ho númeru suspeitu Coronavirus Disease 2019 (Covid-19) ne’ebé tun ona, maibé mantein dixiplina no kumpre regra Estadu Emerjénsia no Organizasaun Mundiál Saúde.

Nia dehan, daudaun ne’e númeru moras Covid-19 iha Timor númeru tun, maibé iha nasaun viziñu hanesan Indonézia no Austrália kada loron númeru kontinua aumenta no vítima mós kontinua aumenta.

“Iha ita-nia fatin kuarentena no fatin izolamentu rekupera barak ona, maibé ita labele orgullu no kontente. Agora ita haree ba ita-nia sorin loos no karuk, nasaun viziñu loron ba loron aumenta no bainhira entrada ne’e loke saida mak ita sei enfrenta, oinsá ita prepara ita-nia aan ba situasaun ne’e,” dehan Komandante Polisia Munisípiu Dili, Superintendente Xefe Armando Monteiro, iha knaar fatin, horisehik.

Nia hatutan, komunidade presiza tau iha hanoin hodi bele implementa iha ida-idak nia-vida moris loron-loron nian, nune’e bele kombate nafatin surtu Covid-19 iha Timor-Leste.

“Tanba ne’e husu ba komunidade ita tenke dixiplina nafatin, tanba ita haree ita nian nasaun viziñu rua husi loron ba loron númeru afetadu ne’e sa’e makaas no vítima mós aumenta,” tenik nia.

Nia reforsa, dixiplina mak sai fatór determinante ba vida komunidade nian no nasaun nia-vida, maibé bainhira komunidade sira la dixiplina maka hotu-hotu sei mate ba surtu Covid-19.

Tanba ne’e, Komandu Munisípiu Dili iha ona planu atu kontinua halo dezinfetante iha fatin públiku sira hodi bele kombate Covid 19.

“Ita sei planeia fila-fali depende ba ezijénsia ita-nia komunidade, no mós haree ba avaliasaun risku pandemia ne’e rasik,” subliña Armando.

Tanba ne’e, PNTL ho apoiu parseiru sira sei tun nafatin iha terrenu oinsá atu sensibiliza hodi hasa’e konxiénsia komunidade nian para iha vontade rasik hodi mantein dixiplina.

Rate this item
(0 votes)

Independente Digital TV