Komandante Operasaun PNTL, Superintendente Xefe Pedro Belo informa, Komando PNTL Munisipiu Dili hato’o ona relatoriu kona-ba kazu membru UPM baku membru KPK Bebonuk ba Komando Jeral PNTL.

Hafoin simu relatoriu refere, Pedro dehan, Komando Jeral hatuun sansaun suspensaun preventiva durante loron 90 ba membru UPM.

Aleinde sansaun ba DAM, nia dehan, Komando Jeral mós fó sansaun ba Primeiro Sarjentu ne’ebé lidera ekipa bainhira kazu refere akontese.

Maske fó ona sansaun, Komandante Operasaun ne’e dehan, prosesu ne’e sei kontinua.

Nia hatutan, Komando Jeral hasai ona despaxu ba departamentu justisa PNTL hodi kontinua halo prosesu dixiplinár.

“Ba parte kriminál nian husi vítima rasik halo ona keixa iha eskuadra (PNTL) Don Aleixo, prosesu oras ne’e daudaun la’o hela, buat hotu-hotu ita tenke tuir lei,” deklara Pedro Belo iha Kuartel Jeral PNTL, Kaikoli, Sesta (13/09).

Molok ne’e, Xefe Suku Bebonuk Serafim Machedo informa, kazu membru UPM baku membru KPK ne’e akontese bainhira membru KPK halo vizilansia iha area Bebonuk.

Iha momentu ne’ebá, nia dehan, membru UPM ho inisial DAM hamutuk ho joven lubuk ida hemu tua iha tasi ibun área Arbiro Beach Bebonuk.

“Ha’u orienta duni membru KPK na’in rua ho inisial AC ho AD ba par haree joven sira hemu tua ne’e lanu karik labele barullu,” dehan nia.

Bainhira to’o iha ne’ebá, Xefe Suku ne’e hatete, membru KPK na’in rua ne’e haree membru UPM uza farda no ho kondisaun lanu tahan sira na’in rua hodi hamosu diskusaun to’o akontese sira baku malu.