Print this page

Jornál INDEPENDENTE Fahe Jornál Gratuitu: Oinsa Covid-19 Daet? Featured

By Jasinto Xavier Marsu 25, 2020 5445
Ekipa redasaun jornal INDEPENDENTE fahe jornal gratuitu ba komunidade sira ne'ebe besik area karantina, Metiaut (Ote Orizoontal), Dili. Foto INDEPENDENTE. Ekipa redasaun jornal INDEPENDENTE fahe jornal gratuitu ba komunidade sira ne'ebe besik area karantina, Metiaut (Ote Orizoontal), Dili. Foto INDEPENDENTE.

DILI:Públiku atu hetan informasaun ida lolos relasiona ho movimentasaun viruscorona (Covid-19) iha Timor-Leste, nuudar mos responsabilidade ida ba Jornál INDEPENDENTE atu kontirbui liu husi asaun fahe jornál gratuitu ba komunidade ho nia tema “Oinsa Viruscorona Daet ho nia Maneiras Prevensaun”.

Tanba ne’e, tersa-horsehik (24/3), ekipa redasaun Jornál INDEPENDENTE, halo asaun fahe jornál gratuitu ba komunidade sira ne’ebé hela besik iha aréa izolamentu no karantina ba covid-19.

Hafoin fahe jornál ba aréa identifikadu, Diretór Jornál INDEPENDENTE, José Sarito Amaral ne’ebé involve mós iha asaun ne’e hatete, bainhira nasaun ne’e hahú infrenta ona ameasas husi covid-19, Jornál INDEPENDENTE hamosu kedas inisiativa ida oinsa atu bele fó sira nia kontribuisaun ba estadu atu bele kombate virus ne’e.

Iha hanoin katak nuudar orgaun komunikasaun sosial ida, importante mak oinsa atu fó informasaun ida lolos ba públiku kona-ba covid-19 ne’e, atu nune’e públiku bele iha koñesimentu bazikamente ba virus ne’e.

Tanba ne’e, asaun jornál INDEPENDENTE halo hanesan edukasaun sivíka ida ba komunidade liu husi produsaun informasaun no fahe informasaun ho gratuitu, atu komunidade hotu ne’ebé hela besik karantina bele asesu.

Fahe jornál gratuitu ne’e prioridade ba komunidade sira ne’ebé hela besik fatin izolamentu no karantina, hanesan iha aréa Metiaut (Hotel Nova Horizonta), aréa Audian (Hotel Audian), no Sentru Saude Vera Crus.

Diretór Jornál INDEPENDENTE esplika katak, la signifika komunidade sira ne’ebé hela dok husi karantina labele hetan informasaun. Públiku hotu-hotu iha direitu atu hetan informasaun detaillamente kona-ba covid-19, bele mós liu husi sentru informasaun ne’ebé Governu estabelese ona ho media sira seluk.

Jornál INDEPENDENTE konsidera fatin hirak ne’e prioridade tanba foin lalais mosu ona kazu husi komunidade balun halo asaun protestu, tuda timoroan balun ne’ebé tama iha fatin karantina. Asaun ne’ebé komunidade balun sira halo, laos komunidade sira nia kulpa ou Timoroan sira ne’ebé hetan karantina ne’e nia kulpa maibé tanba falta informasaun ba sira kona-ba oinsa viruscorona atu daet ho nia prevensaun ne’e.

Espera katak liu husi fahe jornál gratuitu, komunidade sira bele asesu no informadu ba covid-19, atu nune’e bele redus ona sira nia duvidas, paniku no tauk husi ameasas virus ne’e.

“Ami konsidera, kontribuisaun husi ami (jornál INDEPENDENTE) ne’e kiik maibé espera katak bele ajuda ona esforsu estadu nian atu kombate viruscorona ne’e. Liliu komunidade sira bele hamutuk hodi kombate virus ne’e sai husi ita nia nasaun. Ida ne’e mak ami halo, inisiativa liu husi asaun ida, realidade ida no hamutuk kombate Covid-19,”dehan Sarito.

Husi asaun fahe jornál, komunidade sira mós apresia tebes ho inisiativa fahe jornál gratuitu ne’e, tanba sira bele hetan ona informasaun kona-ba covid-19 ne’e.

Entretantu, Conselho de Imprensa de Timor-Leste (CI), hato’o agradese wa’in ba Jornál Independente ne’ebé voluntáriamente produs informasaun kona-ba Covid 19 liuhosi pájina espesiál ida no fahe gratuita ba komunidade sira ne’ebé hela besik iha área karantina moras Covid 19.

“Hakarak Hato’o agradese ba maluk sira hosi Jornál Independente, ne’ebé ho inisiativa sira halo pájina espesiál ida ba pandemia Covid hanesan edukasaun sívika ida ne’ebé sira fahe gratuitamente ba fatin sira izolamentu no karatina ne’ebé ministériu saúde sira identifika. Ida ne’e esforsu ne’ebé ki’ikoan maibé esforsu ne’ebé di’ak no pozitivu tebes ba mídia nia serbisu hodi kontribui desimina informasaun ida loloos ba públiku liuliu ba hirak ne’ebé iha karantina atu nune’e sira kontinua akompaña novidade no situasaun sira iha sosiedade ida ne’e,” dehan Konselleiru Francisco Belo Simões da Costa.

Rate this item
(0 votes)