Ho Esperénsia Ne’ebé FRETILIN Hatudu, Arão Lakohi Tuun Featured

By Aquino Gomes Maiu 13, 2020 3171
Presidente Parlamentu Nasional atual Arao Noe de Jesus ho Presidente Parlamentu Nasional anterior Aniceto Guterres.iha Parlamentu Nasional. Presidente Parlamentu Nasional atual Arao Noe de Jesus ho Presidente Parlamentu Nasional anterior Aniceto Guterres.iha Parlamentu Nasional.

DILI: Ezijensia ba mudansa lideransa iha Parlamentu Nasionál (PN) seidauk hatudu rezultadu, tanba bankada balun iha PN ne’ebé “lidera” husi bankada CNRT la fó ulun, sa tan Prezidente PN Arão Noe rasik hatudu ninia firmeza lakohi tuun husi nia kadeira.

Prazu loron lima ne’ebé bankada FRETILIN, PLP no KHUNTO fó iha rekerimentu destituisaun ba meza PN remata iha Tersa (12/05), maibé Prezidente PN seidauk ajenda rekerimentu refere ba diskusaun.

Arão Noe rekoñese katak prazu ne’ebé bankada tolu ne’e fó bazeia duni ba rejimentu PN, maibé, Arão kaer ba esperensia ne’ebé akontese ona katak ajenda ba destituisaun meza PN bele to’o fulan neen.

Haree fali ba esperensia kotuk iha 2017, Arão dehan, bankada tolu ne’ebé kompostu husi CNRT, PLP no KHUNTO, hatama rekerimentu ba meza PN ne’ebé lidera husi Aniceto Guterres.

“Ha’u rasik momentu ne’eba hanesan Xefe  Bankada CNRT hato’o rekerimentu husu destituisaun ba meza Parlamentu nasionál  iha kuarta lejislatura, iha momentu ne’eba padidu ne’e tama iha Dezembru (2017), Tribunál Rekursu halo desizaun iha 5 Janeiru 2018, mais laiha ezekusaun ba aktu ida ne’e,” dehan Arão.

“Se hakarak ezije, hotu-hotu tenke kumpre regras konstituisionais, legais no rejimentais, mai pratika, ezekuta, mai hotu-hotu kumpre, Prezidente Parlamentu sei la viola regras rejimentais nian ne’ebé mak iha”.

Arão sadik bankada tolu ne’ebé aprezenta rekerimentu destituisaun ba meza PN atu prosesa ba Tribunál Rekursu bainhira Prezidente PN viola konstitusaun no rejimentu  PN.

“Prezidente Parlamentu la preokupa nia aan see loos, maibé hotu-hotu halo tuir buat ne’ebé loos, se sala halo favor Timor-Leste iha regras seluk hanesan konstitusaun no lei kodigu penal, regras sira ne’e iha hotu, halo tuir prosesu ba Tribunal Rekursu, ha’u sei responsabiliza ba aktu ne’ebé mak ha’u halo  karik viola konstituisaun, viola lei no viola rejimentu, ha’u pronto assume,” nia dehan.

Rate this item
(0 votes)

Independente Digital TV