Hein Desizaun Konsellu Ministru Reativa Eskola Featured

By Elsa Belinha Maiu 25, 2020 3299
Reuniaun Konsellu Ministru Reuniaun Konsellu Ministru

DILI: Ministériu Ensinu Superior, Siensia no Kultura (MESSK) sei hein desizaun Konsellu Ministru (KM) kona-ba estensaun Estadu Emerjensia (EE) ba datoluk molok reativa fali prosesu aprendizajen iha Ensinu Superior Públiku no Privadu.

Ministru Ensinu Superior, Siensia no Kultura, Longuinhos dos Santos hatete, MESSK hala’o ona enkontru ho reitór husi ensinu superior sira hodi koalia kona-ba kalendáriu fixu ba prosesu aprendizajen, maibé sei hein desizaun KM kona-ba estensaun EE.

“MESSK hein de’it desizaun husi Konsellu Ministru kona-ba estadu emerjensia ne’e atu kontinua ka hakotu hodi bele fó resposta ba ensinu superior sira,” dehan Longuinhos iha edifisiu Ministériu Finansas, Sesta (22/05).

Nia afirma, ensinu superior sira hein de’it desizaun KM nian hodi halo preparasaun ba graduasaun.

SIJK Sujere Estende EE

Iha 22 Maiu 2020, Sentru Integradu ba Jestaun Krize (SIJK) aprezenta proposta ba estensaun  estadu emerjensia ba datoluk.

Tuir Komandante Operasional daruak SIJK, Brigadeiru Jeneral João Miranda "Aluc Descartes" hatete, tuir SIJK iha nesesidade atu estende EE, maibé desizaun fila fali ba KM.

"Tuir estudu husi Sala de Situasaun, Sentru Integradu ba Jestaun Krize, atu estende bele dehan katak nesesidade, mais desizaun la'ós iha Sala de Situasaun nian, maibé desizaun ne'e iha Konsellu de Ministru,” dehan Aluc.

SIJK, nia hatutan, hatama ona proposta estensaun EE ba dala tolu ba KM no hein de’it desizaun.

"Proposta ami hatama ona ne'ebé ami hein hela aprovasaun husi Konsellu Ministru ne'ebé mak sei halo iha semana oin mai,” nia informa.

Rate this item
(0 votes)

Independente Digital TV