Finalmente Xanana Sama Ain iha Aitarak Laran Featured

By Cristina Ximenes Marsu 06, 2020 4917
Maun Boot Xanana Gusmao ho nia aliadu sira hakat ain ba palacio presidensial, Aitarak Laran, Dili, sesta ohin (6/3). Foto Jonio da Costa/INDEPENDENTE Maun Boot Xanana Gusmao ho nia aliadu sira hakat ain ba palacio presidensial, Aitarak Laran, Dili, sesta ohin (6/3). Foto Jonio da Costa/INDEPENDENTE

DILI: Publika nia hakarak Maun Boot Xanana Gusmão tenki atu hasoru Presidente Repúblika hodi hakotu empase politika rai laran finalmente responsivu.

Sesta-feira ohin (6/3), tuku 9:00 oras Timor-Leste, Xanana Gusmão nuudar Presidente partidu CNRT ho nia aliadu sira, hanesan Partidu Demokratiku, KHUNTO, PDD, UDT/FM sama duni sira nia ain iha Palacio Presidensiál, Aitarak Laran, Dili.

Tuir observasaun Online INDEPENDENTE iha Palacio Presidensiál katak, Maun Boot Xanana hamutuk ho nia aliadu sira nia hakat lalais ba Palacio Presidensiál ho espresaun seriu, uza oklu metan, jas metan, kamizola mutin ho kalsa hena metan.

Antes ne’e, iha ona partidu neen maka forma ona koligasaun foun ne’ebé lidera Partidu CNRT hamutuk ho Partidu Demokrátiku (PD), Kmanek Haburas Unidade Nasionál Timor Oan (KHUNTO), Partidu Unidade Dezenvolvimentu Demokrátiku (PUDD), União Democratico Timorense (UDT) no Frente-Mudansa (FM).

Iha Jornal INDEPENDENTE mós publika ona katak, : Koligasaun foun ne’ebé lider Partidu Congresso Nacional Reconstrução Timor-Leste (CNRT) prepara ona lista fiksu estrutura IX Governu Konstitusionál ne’ebé lidera Primeiru Xanana Gusmão.

Tuir informasaun husi ema besik Xanana katak, lista foun ne’ebé atu aprezenta sei mantein nafatin ho ema antigu na’in lima ne’ebé Prezidente Repúblika rejeita ona, la inklui Hélder Lopes no Tomas Cabral.

Ne’e duni, tuir nia, Partidu CNRT prepara ona lista foun ne’ebé sei lidera husi Primeiru Ministru, Kay Rala Xanana Gusmão, maibé mós la taka dalan atu hakat nafatin ba eleisaun antesipada.

Tuir fonte ne’e, lista foun ne’ebé prepara kuaze na’in 40, maibé sei kontinua nafatin iha diskusaun entre bloku koligasaun sira, nune’e bele aprezenta ba Xefe Estadu iha tempu badak.

Antes ne’e, Primeiru Ministru, Taur Matan Ruak, aprezenta ona karta demisaun ba Prezidente Repúblika, maibé to’o agora seidauk hetan aprovasaun.

Rate this item
(0 votes)

Independente Digital TV