Estende Mandatu Lere Depende Desizaun Polítika Featured

By Domingos Gomes Juñu 28, 2019 973
Lere Lere

DILI: Estensaun ba mandatu Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, depende desizaun polítika husi Governu no Presidente Repúblika.

Vise-Xefe Maiór Jenerál F-FDTL, Brigadeiru Jenerál Falur Rate Laek hatete, estende kontinuidade mandatu Jenerál Lere nian ne’e kompeténsia Governu ho Prezidente Repúblika mak bele deside.

“Atu estende ka lae depende desizaun polítika. Ha'u la hatene tanba ami iha ne’e hanesan ezekutivu”, dehan nia, iha Palásiu Prezidensiál, Bairru-Pité, horisehik.

Iha moru-mutu ho Prezidente Repúblika, Francisco Guterres Lú Olo, diskute mós kona-ba preparasaun treinu ba forsa sira hodi akompaña Xefe Estadu konvidadu sira ne’ebé atu partisipa iha serimónia 30 Agostu nian.

Tuir planu, Xefe Estadu na’in sanulu mak sei partisipa iha serimónia Loron Konsulta Populár ba dala 20, tanba forsa defeza mós hola parte hotu ba komisaun organizadora.

Nune’e, ko’alia mós ho Xefe Estadu kona-ba mudansa iha F-FDTL ba mudansa pozisaun iha fronteira ba forsa terrestre, inklui postu hotu-hotu iha territóriu Timor laran tomak.

Nia afirma, forsa hirak ne'ebé iha Oekusi no Atauru, Komponente Navál rasik mak halo iha faze preparasaun laran hodi troka malu.

Tuir Falur, nomeasaun komandante komponente sira ne’e atu toma responsabilidade ba atividade operasionál ho di'ak, kuandu ema ne'ebé pozisaun kleur liu iha fatin ida ona bele tama ba sala ho naran autoritáriu no rotina ábitu, tanba ne’e tenke muda.

Rate this item
(0 votes)

Independente Digital TV