Print this page

Estadu Emerjénsia, Sidadaun Sei Bele Ba Ospitál-Lojas Featured

By Marsu 26, 2020 19983
PM Taur Matan Ruak PM Taur Matan Ruak

DILI:Timor-Leste sei hahú aplika Estadu Emerjénsia, iha loron 28 fulan-Marsu, oras 00:00 too 26 fulan-Abril 2020, iha oras 23:59.

Estadu Emerjénsia ne’e, relasiona ho ameasas ne’ebé Timor-Leste infrenta dadaun ho identifikadu ema na’in ida mak positivu ona ba covid-19.

Tanba ne’e, subtansia husi estadu emerjénsia ne’e mak sei limite direitu sidadaun nia movimentasaun.

Primeiru Ministru Taur Matan Ruak hatete, direitu sidadaun sei limita, maibé la’ós blokeiu total.

Tuir Xefe Governu dehan, sidadaun sei bele asesu ba Óspital, Klínika no ba Loja sira hodi sosa nesesidade báziku, maibé sei iha regra ruma ne’ebé kesi.

Enkuantu sei bandu total atividade sira ne’ebé halibur ema barak, hanesan festa, manifestaun no seluk, ne’ebé bele provoka kontajia virus.

“Em prinsípiu movimentu sei limita, mas aplikasaun medida sira ne’e sei tuir evolusaun situasaun nian, tanba ita laos dehan labele be labele! ita mós presiza ba ospitál, presiza ba iha klínika, presiza ba sosa buat ruma, maibé sei iha regra para hotu-hotu tuir, para labele ba halibur malu, la’o besik malu para depois bele kontajia malu liuliu kuandu sira ne’ebé suspeita kontajiu ne’e bele kontajia sira seluk, mas medida sira ne’e sei fó hatene,”esplika Xefe Ezekutivu ba imprensa sira hafoin remata plenária autorizasaun ba Estadu Emerjensia, iha Parlamentu Nasionál, Kinta ohin.

Entretantu Xefe Governu mós agradese tebes ba Deputadu sira hotu, ba desizaun fó autorizasaun ba Prezidente Repúblika atu dekreta Estadu Emerjénsia ho unanimidade, hodi hatutan, ne’e nu’udar momentu istória no ezemplár hodi hatudu ba povu Timor-Leste katak, maske iha diferensa ideia, maibé iha momentu Estadu no povu nia vida iha risku, polítika sira tau forsa hamutuk ho objetivu ida de’it, luta kontra COVID-19.

PM Taur apela ba sidadaun sira, atu koopera, liuliu família sira ne’ebé, família ruma husi li’ur, bainhira hakarak fila mai rai-laran, mak subar-subar informa ba Médiku sira ka Polísia atu bele ba tama kuarentena loron 14, nu’udar meus prevensaun atu labele lori virus ne’e ba kontajia família iha uma no ba komunidade seluk, tanba virus ne’e kontajia fasil tebes hosi ema ba ema. (KI)

Rate this item
(3 votes)
Last modified on Kinta, 26 Marsu 2020 21:02
Jose Sarito Amaral

Latest from Jose Sarito Amaral