Print this page

Ema 53 sei Refujia iha Edifísiu PNTL Likisá Featured

By Domingos Gomes Jullu 12, 2019 4411
Komandu PNTL Komandu PNTL

DILI: Hafoin akontesimentu krime omisídiu iha Aldeia Baura, Suku Leorema, Bazartete-Likisá hodi rezulta ema na’in rua mate, komunidade husi fatin ne’e hamutuk na’in 53 oras ne’e daudaun refujia iha edifísiu PNTL Munisípiu Likisá.

Komandante PNTL Munisípiu Likisá interinu, Superintendente Asistente Luis da Silva hateten, hafoin akontesimentu asasinatu, iha Kinta (4/7), PNTL halo kedas evakuasaun ba komunidade hamutuk na’in 53 mai hela iha Likisá-Vila.

Ema sira ne’ebé oras ne’e refujia iha edifísiu PNTL Likisá, maioria família husi ema sira ne’ebé deskonfia nu’udar suspeitu iha kazu ne’e. Nune’e, evakuasaun ne’e halo hodi evita mosu vítima foun.

“Sira mai hela iha uma mamuk ida iha kantor polisia nia kotuk, nune’e ami bele fó seguransa ba sira”, dehan Luis, via telemovel, horisehik.

Nia hatutan, refujiadu sira durante ne’e hetan apoiu umanitária husi Ministériu Solidariedade Sosiál (MSS) no Ministériu Saúde (MS), inklui Ministériu Edukasaun (ME) hodi haree ba estudante sira ne’ebé paradu eskola. Nune’e, parte PNTL nian fó apoiu seguransa.

Kona-ba kondisaun ikus liu iha Suku Leorema, nia dehan, situasaun hotu-hotu kontroladu tanba oras ne’e daudaun hetan seguransa makaas husi PNTL Likisá no Batallaun Orden Públiku (BOP).

Entretantu, Komandante Jerál PNTL, Komisáriu Faustino da Costa, hatete kazu Leorema ne’ebé rezulta na'in rua mate, tolu kanek no sunu uma 13, polisia detein ona ema na’in 12.

“Ema ne’ebé ita kaptura hamutuk na’in 12 no ida tama prizaun preventiva”, dehan Komisáriu Faustino.

Kona-ba refujiadu sira, nia dehan, komandu kontinua hamutuk ho autoridade munisipal sira hodi koordena atu reintegra fali sira ne’ebé sai husi sira-nia hela fatin.

“Estudante sira ne’ebé sai husi sira-nia hela fatin la eskola tanba sira-nia roupa hetan sunu, agora ita haree hela hamutuk ho autoridade”, tenik nia.

Ho situasaun ne’e Komandu PNTL koloka ona postu temporariu ida iha fatin akontesimentu hodi garante nafatin estabilidade iha área ne’e.

Antes ne’e, liu husi primeiru interrogatóriu, Tribunál Distritál Dili (TDD) aplika ona medida koasaun prizaun preventiva ba arguidu SP ne’ebé rekoñese-aan halo krime omisídiu ba vítima sira.

Rate this item
(0 votes)