Eleitór Rihun 18 iha Estranjeiru La Inklui Indonézia Featured

By Ligia Noronha Abril 25, 2018 2624
Urnas eleisaun jeral 2017 Urnas eleisaun jeral 2017

DILI: Sekretariadu Tékniku Administrasaun Eleitorál (STAE) rejista ona eleitór rihun 18 iha estranjeiru, la inklui Indonézia.

Provizoriamente númeru ne’e, kobre de'it nasaun Portugál, Inglaterra, Austrália no Koreia du Súl.

Diretór Jeral STAE Acilino Manuel Branco hateten, kona-ba númeru eleitores iha rai liur rihun 18, STAE ofisialmente sei entrega iha loron 4 fulan-Maiu hafoin halo akta no asina.

Nasaun ne’ebe tuir eleisaun antesipada, mak hanesan Portugál, Austrália, Inglaterra no Korea.

Iha Inglaterra mak aumenta tan sentru votasaun rua tanba resenseamentu ne’e nia númeru boot.

Uluk implementa iha Londres no agora aumenta tan iha Oxford no Portugál, ida iha Korea aumenta tan, Austrália mak nafatin.

“Ha’u hanoin, kona ba Indonézia depende desizaun entre estadu rua, karik iha konkordánsia oinsá atu bele fó direitu hanesan iha sidadaun ne’ebé estuda, STAE hanesan órgaun tékniku  hein  atu kompromete ba iha desizaun sira ne'ebé iha,”dehan nia ba jornalista sira iha palasiu governu horisehik.

Kona ba transportasaun materiál ba rai liur, Diretór ne’e esplika, oras ne’e daudaun hein de’it no falta de’it mak diplomata sira iha rai liur mai Dili.

Tuir lei atu prezide prosesu votasaun iha rai liur no sira sei too iha loron 1 fulan-Maiu 2018.

Iha loron 4 fulan-Maiu sira hamutuk ho ekipa tékniku husi STAE lori materiál sira ne’e no prepara sei halo formasaun ba sidadaun Timor ne’ebé identifika ona iha nasaun hirak ne’e.

Oras ne’e sei halo hela numerasaun ba iha buletin votus no STAE sei fó tan loron ida ka rua atu halo verifikasaun, no bainhira deteta buat balun hanesan naklees ka fo'er fó fila hodi halo foun.

Kona-ba materiál falta de’it buletin votus, ne'ebé hein atu finaliza imprime no hein loron 4 entrega.

Total orsamentu, Acilino dehan depois eleisaun mak  foin hatene nia balansu ne’e hira mak ezekuta.

 

Rate this item
(0 votes)
Last modified on Kuarta, 25 Abril 2018 10:10

Independente Digital TV