Enkuantu uma hamutuk 28 iha Suku Asumanu, Postu Administrativu Bazartete, Munisipiu Likisa, mak ahi haan, no uma hamutuk 17 mak anin sobu.

Diretor Jeral Protesaun Sivil, Superintendente Asistensia Polisia Ismail da Costa Babo informa, kazu ne’e akontese iha Kuarta (02/10) maizumenus tuku 9:00.

Deskonfia ahi ne’e mosu husi ema balun ne’ebé sunu rai no tanba anin maka’as ahi refere ho lalais daet ba komunidade nia uma.

Ahi fofoun haan uma iha area Ermera no ho lalais alarga ba suku ida iha Likisa ne’ebé nu’udar viziñu. “Iha suku tolu mak afeitadu husi insendiu ne’ebé boot tebes, hanesan suku Lisapad, Suku Mau-ubu, no Urahou. Suku tolu ne’e baliza kedas ho Likisa no insendu ne’e alarga hodi afeita mós ba area Asumanu nian,” Informa Ismail ba jornalista INDEPENDENTE, liu husi telephone, Kinta (03/10).

Tuir informasaun ikus to’o horikalan tuku 22:00, uma hamutuk 324 mak hetan estragus. Dezastre ne’e hakanek ema na’in ida (1) iha Munisipiu Ermera, no ema na’in rua (2) iha Munisipiu Likisa.

“Sira ne’e kanek tanbá halai ba kafé laran mak ai fai no halai mak monu, kanek kaman, seidauk identifika kanek todan,” dehan Ismail.

Diretór Jeral ne’e dehan, nia parte simu informasaun iha tuku 15:00 katak ahi hahú haan uma iha tuku 09:00 dader.

“Ami simu informasaun iha tuku 3:00 lorokraik, ha’u mobiliza bombeirus no ami mai iha ne’e grupu rua, grupu ida aranka ba Likisa nian iha Leorema, grupu boot ida mai iha Ermera, ami to’o iha ne’e hodi kalan, ami tenta hamate ahi balun, maibé balun ami la konsege, sira ne’ebe iha estrada ibun ami konsege hamate, maibé sira foho lolon to’o agora ahi sei moris,” informa nia.

Insendiu ne’e, aliened estraga komunidade nia hela fatin, halo komunidade nia animal lubuk ida mak mate.

“Insendu ida ne’e provoka animál lubuk ida mak mate hanesan bibi, fahi, karau, no asu, inklui manu, maibé sedauk identifika hotu,” dehan nia.

Kona-ba fonte ahi, nia dehan, DNPS kopera ho polisia atu buka tuir informasaun kona-ba fontes ahi husi ne’ebé.

“Populasaun sira dehan horsehik ne’e anin boot derrepente de’it ahi mosu sa’e de’it mai husi mota, no depois provoka fatin hothotu ahi haan. Ahi haan iha kraik depois anin lori ahi sa’e haan uma sira ne’e,” nia dehan.

Daudaun ne’e, DNPS konsentra ona populasaun sira iha fatin seguru hanesan familia sira-nia uma no eskola, hafoin sei distribui apoiu emerjensia dahuluk.