Print this page

Deputadu PLP Kritika Governu Haruka Timor-oan Rihun 30 Serbisu iha Rai Li’ur Featured

By Tome Amado Marsu 24, 2019 1462
Deputadu husi Partidu Libertasaun Popular (PLP) no Vise Prezidente Komisaun G trata asuntu Edukasaun, Juventude, Kultura, no Sidadania,Sabino Soares “Guntur”. FOTO: dok Deputadu husi Partidu Libertasaun Popular (PLP) no Vise Prezidente Komisaun G trata asuntu Edukasaun, Juventude, Kultura, no Sidadania,Sabino Soares “Guntur”. FOTO: dok

DILI: Deputadu husi Partidu Libertasaun Popular (PLP) Sabino Soares “Guntur” preokupa ho Timor-oan na’in rihun 30 ne’ebé sei ba serbisu iha rai li’ur.

Tuir Vise Prezidente Komisaun G trata asuntu Edukasaun, Juventude, Kultura, no Sidadania ne’e, Timor-oan rihun 30 ne’ebé sei ba rai li’ur hodi serbisu tanba governu laiha planu di’ak atu forma juventude ne’ebé ho idade produtivu.

Tuir nia, númeru rihun 30 ne’ebé governu sei haruka ba rai li’ur ne’e sei fó impaktu ba kresimentu iha rai laran.

Tanba, deputadu PLP ne’e dehan, loloos juventude ho idade nurak ka produtivu tenke prepara an atu kontinua dezenvolve rai ida ne’e. Maibé realidade, governu haruka hotu ba rai li’ur hodi serbisu iha area sira ne’ebé mak la benefesia futuru nasaun nian.

“Ita orienta sira ba serbisu iha rai li’ur ne’e atu buka osan hodi sustenta sira-nia familia, referensia hanesan ne’e so iha nasaun Kuba mak implementa ona. Agora ba futuru nasaun nian governu halo ona saida atu prepera joven sira?”, deputadu ne’e kestiona liu husi intervista ho jornalista sira iha PN, Kuarta (20/03).

Tuir nia, governu laiha planu di’ak atu forma joven sira oinsa atu hamrik mesak tanba governu laiha fatin atu akumula joven sira iha area industria nune’e alternativu ne’ebé halo mak haruka sira ba rai li’ur.

Nia dehan, daudauk ne’e fatin iha Timor Leste kuaze domina husi ema Xina. Lolos governu tenke brani foti risku hodi fó kreditu ba joven sira atu fila liman.

“Ita-nia governu la halo kalkulasaun ba problema sira ne’e. Xina sira mak fa’an buat ne’ebé Timor-oan sira bele halo. Maibé ita tau sees tiha futuru nasaun nian hodi fó fatin ba ema husi li’ur mak mai loke fali kios ki’ik sira”.

Guntur afirma, governu tauk atu loke investimentu boot ba Timor-oan sira atu muda sira-nia moris, nune’e dalan di’ak liu ba joven sira mak halai ba rai li’ur, tanba iha ne’eba mosu balansu ekonomia entre materia ho osan.

“Laos hanesan iha Timor, serbisu osan ki’ik maibé folin sasan sa’e maka’as. Oinsa sira bele sustenta moris familia ho salariu por mes $115 dolar?,” dehan nia.   

Maske hato’o kritika, maibé Guntur dehan iha mós vantajen husi haruka trabaladór Timor-oan ba rai li’ur.

“Ba futuru kuandu nasaun ne’e harii ona industria ka fabrika, governu bele dada fali sira mai hodi serbisu. Ida ne’e hanesan meius ida ne’ebé governu halo,” katak nia.

Iha fatin ketak, Deputadu Bankada UDT/FM, Gilman Exposto mós preokupa ho Timor-oan sira ne’ebé hada’u-malu ba serbisu iha rai li’ur.

“Ha’u husu ba joven sira di’ak liu hanoin didi’ak, lalika hada’u-malu atu ba rai li’ur hodi buka serbisu, imi-nia futuru sei naruk, di’ak liu eskola par bele hetan futuru ida di’ak liu”.

Gilman sujere ba governu atu kria sistema ida hodi husu estatutu husi joven ne’ebé mak ba hatama aplikasaun.

“Se nia estudante ida tenke trava kedas par nune’e labele lakon ninia estudu,” nia sujere.

Rate this item
(0 votes)