CNRT ne’ebé Hahú Hakat La Hanesan Featured

By Aquino Gomes Maiu 07, 2020 2482
CNRT iha kampanha paartidu politiku tinan 2017. Foto INDEPENDENTE CNRT iha kampanha paartidu politiku tinan 2017. Foto INDEPENDENTE

DILI: Aktu partidu politikus iha Timor-Leste halo xoke barak. Hahú husi aktu deputadu CNRT ne’ebé xumba Orsamentu Jeral Estadu ne’ebé ninia governu rasik aprezenta, desizaun partidu KHUNTO ne’ebé sai husi Aliansa Maioria Parlamentar (AMP) foun, to’o deklarasaun bankada CNRT ne’ebé husu atu FRETILIN no CNRT tuur hamutuk.

Aktu foun liu ne’ebé halo públiku hakfodak uitoan mak deklarasaun bankada CNRT iha Parlamentu Nasionál iha Tersa (05/05), ne’ebé husu ba Prezidente Repúblika Francisco Guterres Lu Olo, hafoin ninia partidu hato’o pedidu ba Tribunal Rekursu (TR) atu halo apresiasaun tanba konsidera PR Lu Olo viola Konstituisaun RDTL.

Iha loron ida tuir mai, Konsellu Politika Nasionál (CPN)-Partidu CNRT deklara katak bankada CNRT hasai deklarasaun iha 5 Maiu laos ho orientasaun husi partidu.

CPN deklara, sei foti medidas ba deputadu CNRT ne’ebé halo deklarasaun refere.

“CPN sei hola medidas no husu responsabilidade ba deputadus CNRT sira ne’ebé halo konferensia imprensa iha 5 fulan Maiu,” dehan Vise Prezidente Partidu CNRT, Virgilio Smith, liu husi konferensia imprensa iha Sede CNRT, Bairru dos Grilhos, Kinta (06/05).

Nia dehan, CPN ho estrutura tomak partidu nian afirma nia konfiansa tomak no laiha rezerva ba Presidente CNRT Kay Rala Xanana Gusmão.

Tanba ne’e, nia dehan, CPN konsidera deklarasaun deputadu CNRT sira iha PN hanesan atus individual.

“CPN konsidera deklarasaun husi deputadu CNRT sira nian hanesan atus individuais, la reprezenta partidu nia pozisaun,” nia hatete.

Iha fatin ketak, Prezidente Bankada CNRT Duarte Nunes rekoñese duni katak konferensia imprensa ne’ebé bankada CNRT halo iha 5 Maiu la ho orientasaun husi partidu.

Maibé, tuir nia, ida ne’e hanesan apelu ida ne’ebé deputadu sira husi bankada CNRT halo ba líder partidu rua no Prezidente Repúblika, tanba deputadu CNRT preokupa ho situasaun ne’ebé durante ne’e povu hasoru.

“Ida hanesan preokupante, tanba ne’e mak ami bankada soe hela, maibé laiha orientasaun husi Partidu CNRT nian, hanoin ida tenke klaru,” dehan nia.

Tuir nia, intensaun husi deklarasaun ne’ebé bankada halo laos atu partidu boot rua atu hamutuk kaer ukun, maibé apelu ida atu oinsá partidu rua ne’ebé hetan mandatu no iha votus barak liu husi sira seluk hamutuk bele solusiona situasaun agora ne’e.

“Hanoin katak karik husi partidu sira rona, sira bele dezenvolve. Maibé ha’u haree iha estetmentu husi Mari Alkatiri, nia dehan konkorda karik enkontru ne’e husi forsa Parlamentu hotu no inisiativa husi Prezidente Repúblika. Ne’e signifika katak Prezidente Repúblika mak organiza situasaun ne’e, maibé ida ami-nia opiniaun de’it, ami soe hela, simu, la simu, ami hanesan reprezentante povu soe hela ba públiku, mais laiha orientasaun husi partidu, ne’e klaru,” nia dehan.

Rate this item
(0 votes)

Independente Digital TV