Prezidente CNE, Alcino Barís de Araújo hatete, ba materiál sensitivu ne’ebé sei utiliza ba eleisaun parlamentár faze imprime hotu, hein de’it halo pakotementu ba buletin votu sira ne’ebé hetan estragu durante prosesu imprime no sei ba halo destruisaun ba fatin lixu Tibar.

“Tuir kalendáriu operasionál, iha loron 4 Maiu 2018, sira tenke entrega ona ba iha Sekretariadu Tékniku Administrasaun Eleitorál (STAE) para bele transporta materiál sira ne’e fahe daudaun ona ba munisípiu sira no mós ba estranjeiru”, dehan nia, iha edifísiu CNE, foin lalais ne’e.

Tuir nia, atu distribui ba iha estranjeiru mak hanesan Portugál, Austrália, Inglaterra ho Koreia Súl no ida ne’ebé hanesan aat no la uza, sira tau ba iha ne’e no hein orientasaun CNE ho STAE nian hodi halo rahun iha momentu ne’ebé sei nakloke, nune’e labele iha interpretasaun oi-oin.

Iha fatin hanesan, Diretór INL, Jaime Fernando hatete, oras ne’e daudaun sira halo ona imprime buletin de votu hamutuk 873.050 no totál livru hamutuk rihun 17.461.

Nia dehan, tuir kalendáriu CNE nian katak iha loron 1 too 2 Maiu 2018 mai fila fali halo verifikasaun fila-fali, nune’e iha balun presiza para atu koloka ne’e hotu mak foin halo pakotementu hatama iha kaixa, nune’e iha loron 4 Maiu 2018 entrega ona ba STAE.