Aniceto Hakarak ‘Hamoos’ Meza PN, KHUNTO Husu Lalika Radikál Liu Featured

By Aquino Gomes Maiu 25, 2020 8328
Parlamentu Nasional Parlamentu Nasional

DILI: Prezidente Parlamentu Nasionál, Aniceto Guterres, iha planu atu halo mudansa radikál iha estrutura Meza Parlamentu Nasionál, inklui Komisaun Espesializada sira.

Tuir plataforma ne’ebé halo, deputadu sira husi Bankada CNRT ne’ebé tama iha estrutura Meza PN no Komisaun Espesializada sira sei tebe sai hotu, nune’e bele garante nafatin funsionamentu servisu Parlamentu Nasionál.

“Iha ona entendimentu husi partidu tolu (FRETILIN-PLP-KHUNTO) sei halo alterasaun sekretaria ho vise-sekretaria. Ha’u hanesan Prezidente Parlamentu hein entendimentu husi bankada maioria parlamentár hodi aprezentasaun kandidatu sira,” dehan nia, iha Uma Fukun PN, Sesta (22/5).

Nia rekoñese atu halo mudansa ne’e ajenda ona, maibé depende bankada tolu nian. Posibilidade iha semana oin bele halo ona.

Nune’e, nia dehan, agora mosu ona konfigurasaun polítika foun, maioria ida bele iha entendimentu para altera meza komisaun sira ne’ebé agora eziste.

“Se iha ona pedidu, komisaun ida-idak bele reuni halo alterasaun ba sira nia meza, tanba iha komisaun iha reprezentasaun bankada iha hotu,” dehan nia.

Entretantu, Vise-Prezidente PN, Luis Roberto da Silva hatete, la’ós iha plataforma foun hakarak muda hotu tuir maioria nia hakarak, maibé Partidu KHUNTO hakarak haree mós maluk sira ne’ebé servisu kleur ona hodi asume kargu hanesan sekretaria no vise sekretaria meza.

Nia hatutan, presiza halo komunikasaun ho sira molok halo mudansa, labele haree partidu A ka B, maibé tenke koopera hamutuk hodi asume responsabilidade.

“Ita lalika radikál liu ba ita-nia partidu para hamosu buat ne’ebé ita lakohi atu mosu... Labele dehan FRETILIN, PLP no KHUNTO mak domina buat hotu, ne’e KHUNTO mós lakohi ida ne’e,” tenik nia.

Nia hatutan, Bankada KHUNTO hakarak maski iha mudansa polítika iha Parlamentu Nasionál, maibé presiza halo komunikasaun di'ak ho Bankada hotu-hotu.

Kona-ba halo mudansa ba Prezidente Komisaun Espesializada sira, nia dehan, presiza haree uluk normalizasaun funsionamentu Meza PN nian.

Agora daudaun asume kargu Sekretaria no Vise-Sekretaria Meza PN mai husi Bankada CNRT ho UDT/FM.

Entretantu, Komisaun Espesializada ne’ebé estabelese iha Parlamentu Nasionál hamutuk komisaun hitu (7), ne’ebé maioria lidera husi Bankada CNRT.

Agora daudaun Sekretaria Meza, Deputada Maria Teresinha Viegas da Silva (CNRT) no Vise-Meza, Deputada Isabel Maria Freitas Ximenes (UDT/FM).

Nune’e, Prezidente komisaun Espesializada mak hanesan, Prezidente Komisaun A, Deputada Carmelita Caetano Moniz (CNRT), Prezidente Komisaun B, Deputadu Adérito Hugo da Costa (CNRT), Prezidente Komisaun C, Deputada Maria Fernanda Lay (CNRT), Prezidente Komisaun D, Deputada Virgínia Ana Belo (CNRT), Prezidente Komisaun E, Deputadu Abel Pires da Silva (PLP), Prezidente Komisaun F, Deputada Maria Gurrumali Barreto (CNRT), Prezidente Interinu Komisaun G, Deputadu Sabino Soares “Guntur” (PLP).

Rate this item
(1 Vote)
Last modified on Segunda, 25 Maiu 2020 07:59

Independente Digital TV