Tanba ne’e tuir planu, iha 30 Agostu 2019, Primeiru Ministru Australia Scott Morrison sei mai iha Timor-Leste hodi partisipa komemorasaun loron 30 Agostu ne’e, no troka nota ho Primeiru Ministru Taur Matan Ruak.

“Tanba Primeiru Ministru Australia mós atu mai, nia husu hela atu governu mos konsidera, ami mós buka hela fatin, sei husu ba PN,” informa Xefe Negosiadór Prinsipal FM Kay Rala Xanana Gusmão, iha plenaria Parlamentu Nasional, kuarta (16/7).

Aleinde PM Australia, Prezidente Asembleia Nasional Portugal mós sei marka prezensa iha loron istoriku ne’e.

“Sekretariu Jeral ONU la mai tanba nia iha komprimisiu ne’e uluk nia aseita tiha ona. Prezidente Portugueze mós la mai ne’ebé nia fó hela ba Prezidente Asembleia Nasional Portugal nian mak atu mai”.

“Ita sei diskuti didi’ak karik kolia tiha mak Primeiru Ministru Taur Matan Ruak ho Primeiru Ministru Australia troka nota iha ne’e ita sei basa liman ho kontente ho simboliku no istoriku tebes,” dehan Xanana.

Tanba, nia dehan, hahú husi loron 30 Agostu bainhira troka nota signifika Timor Leste hetan ona ninia soberania ne’ebé kompletu.

“Titulu ho kontratus atividade petroliferas Bayu Undang ne’ebé pertense ba Australia mai hotu ona Timor Leste”.

Tanba ne’e, Xanana afirma, nia parte aprezenta proposta alterasaun ba Konsellu Ministru no daudauk ne’e diskuti hela iha Parlamentu Nasionál.

“Importante atu ita konsidera, tanba sa mak lori to’o agora ne’e no tanba sa mak ita ejize malu hela?,” dehan nia.