Kuarta, 20 Fevereiru 2019 | Login
Lixu iha kapital Dili Lixu iha kapital Dili

Tinan Ida Governu Gasta Tokon $1.5 Rekolla Lixu Featured

DILI: Governu Timor-Leste liu husi Ministériu Administrasaun Estatál (MAE) kada tinan sempre gasta osan tokon $1.5 hodi rekolla fo'er iha Dili laran no ba munisípiu sira.

Sekretáriu Estadu Administrasaun Podér Lokál, Samuel Mendonça hateten, kada tinan obrigatoriamente governu tenke hasai osan ba saláriu no vensimentu pesoál saneamentu no ba aluga karreta hodi ra'ut lixu.

Husi montante orsamentu ne'ebé gasta, barak liu iha Dili, tanba haree ba nesesidade boot liu kompara ho munisípiu sira seluk.

Nia hatutan, agora daudaun karreta ne'ebé ra'ut lixu ne’e mai husi kompañia privada sira ne'ebé governu aluga. Tanba ne’e, MAE iha ona planu ba futuru sei iha halo prosesu residu solidu urbanu mais moderadu.

“Ba oin governu sei sosa karreta ne'ebé dirak no apropriadu ne'ebé bele press lixu, atu nune’e bele koloka lixu tuir nia tipu atu ita bele halo fali resiklajen,” dehan nia, servisu fatin, horisehik.

Tuir nia, osan ne'ebé gasta ba iha rekolla lixu ne’e sa’e tanba konxiénsia sidadaun nian seidauk iha hodi soe fo'er arbiru. Tanba ne’e, tenke hasai osan boot hodi hamoos sidade atu bele moos nafatin.

Tuir nia, regulamentu kona-ba soe fo'er iha dadeer to’o derit tuku 05:00 no bandu atu labele soe iha tuku 06:00 ba leten, maibé komunidade sira ba soe fo'er arbiru nafatin la tuir ninia tempu.

Regulamentu sira ne’e sosializa hotu ona, maibé ba komunidade no emprezáriu sira kontinua halo. Ne’e duni, governu mós kontinua hasai osan hodi responde lixu sira ne’e atu bele garantia nafatin kapitál sidade nasaun no munisípiu sira.

Planu seluk ne’ebé governu prepara mak iha futuru komunidade no emprezáriu sira sei selu koima ba lixu nian liu husi selu prepagu eletrisidade. Kada fulan ba sosa token ka pulsa eletrisidade sei ko'a koin iha ne'ebá.

Tanba ne’e, ba futuru governu sei la hasai ona osan Estadu nian hodi rekolla lixu, maibé liu husi koin ne'ebé ko'a sosa token eletrisidade nian.

Emprezáriu boboot sira hanesan Timor Plaza no supermerkadu sira ne'ebé eziste iha Dili no kapitál munisípiu, sira sei selu diferente ho komunidade sira. 

Read 731 times
Rate this item
(0 votes)

About Author