Kinta, 27 Juñu 2019 | Login
Primeiru Ministru Taur Matan Ruak partisipa misa kuarta feira sinzas iha igreja Bidau. FOTO: GPM Primeiru Ministru Taur Matan Ruak partisipa misa kuarta feira sinzas iha igreja Bidau. FOTO: GPM

Tempu Kuaresma, Tempu Reflesaun, PM Taur Preokupa Igreja Mamuk Featured

DILI: Primeiru Ministru Taur Matan Ruak preokupa Timor-oan sira ne’ebé iha tempu funu nia laran nakonu iha igreja, maibé ukun rasik an Igreja mamuk no joven barak mak dook husi Igreja.

PM Taur hato’o kestaun ne’e hafoin partisipa iha misa Kuarta-feira Sinzas iha Igreja Bidau Mota-klaran.

PM Taur hatete, iha tempu funu nia laran joven sira nakonu iha Igreja hodi husu no simu bensaun husi Aman Maromak atu bele hetan ukun rasik an, maibé hafoin hetan ukun rasik an, igreza laran mamuk no joven barak mak dook husi igreja.

“La’ós tempu susar nia laran mak hakbesik an ba Igreja atu husu bensaun husi Maromak, maibé nu’udar sarani Katolika tenke hatene ida-idak nia obrigasaun hakbesik an ba Maromak,” dehan PM Taur ba jornalista sira, Kuarta (06/03).

Relasiona ho tempu kuaresma, PM Taur husu ba Timor-oan hotu atu ida-idak halo reflesaun ba ninia an rasik hodi lembra pasadu, nune’e konsentra hodi kontribui maka’as dezenvolve povu no nasaun.

“Mai husi rai, sei fila ba rai. Halo buat hotu ne’ebé ita bele hodi tau-matan ba ita maluk sira iha ita-nia rai, tanba ne’e loron ohin ne’e reflesaun ida, ha’u husu ba Timor-oan hotu-hotu halo fuan hakmatek hodi serbisu ba ita-nia rai,” dehan Taur.

Tanba ne’e, PM Taur kontinua fó korajen ba Timor-oan hotu atu iha semana santa ida ne’e se liman ba malu, fó neon ida, labele rai odiu ba malu, atu nasaun bele hakmatek, iha domin, dame no pás nia laran.

Read 839 times
Rate this item
(0 votes)