Kinta, 27 Juñu 2019 | Login
Soe Bebee Soe Bebee

Polisia Detein Inan Soe Bebé Featured

DILI: Polísia Nasionál Timor Leste (PNTL) Munisípiu Dili detein feto ida ho inisiál IP ne’ebé deskonfia soe nia bebé.

Kazu soe bebé akontese iha Tersa (04/06) maizumenus tuku 12 meiudia iha Aldeia Teka, Hudi Laran, Suku Lahane Osidentál, Postu Administrativu Vera Cruz, Munisípiu Dili.

Hafoin rona informasaun ida ne’e, iha loron ne’e kedan polisia konsege kaer inan ne’ebé deskonfia soe bebé.

Tuir informasaun, IP soe nia oan-mane ne’ebé foin moris iha uma mamuk ida ne’ebé lokaliza iha aldeia Teka.

Komunidade ida Mario Nunes konsege hetan bebe mane ne’e ho kondisaun moris no fó hatene ba komunidade sira seluk hafoin hato’o informasaun ba polisia.

“Horisehik kedan (tersa), bainhira ami simu informasaun husi Sr. Mario, ami orienta kedas ita-nia polísia Investigasaun Kriminál Dili nian serbisu hamutuk ho ekipa sub-seksaun ne’ebé toma konta ba vulnerabilidade krime nian ba to’o kedas iha fatin, buka kedas konfirmasaun no hetan suspeitu ba kazu ida so’e bebé ne’e hodi kaptura kedas,” informa Komandante Interinu PNTL Dili, Superintendente Asistente Euclides Belo ba jornalista sira, iha ninia knar-fatin, Kaikoli, Kuarta (05/06).

Hafoin kaptura, polisia lori IP ba halo teste mediku hodi hatene loloos IP mak inan husi bebé ne’e ka lae.

“Informasaun ikus ne’ebé mak ami hetan katak loos duni suspeita inan ne’ebé mak so’e bebé ne’e mak naran inisial IP ne’e”.

Nia hatutan, mediku sira mós informa ba polisia katak IP ho kondisaun di’ak, tan ne’e tenke la’o tuir prosedimentu kriminál ne’ebé mak iha.

“Ami mós komunika ba parte prokuradór katak depende ba informasaun husi parte médiku, katak kondisaun fíziku husi inan ne’e di’ak par ita detein, entaun ita detein.

Entretantu, bebe mane ne’ebé komunidade sira hetan lori kedan ba Sentru Saúde Vera Kruz, Dili, hodi hetan asistensia.

Read 331 times
Rate this item
(0 votes)