Kinta, 27 Juñu 2019 | Login
Arguidu Emilia Pires, Eis Ministra Finansas. FOTO: dok Arguidu Emilia Pires, Eis Ministra Finansas. FOTO: dok

Kazu Emilia Pires, PM Taur: “Ha’u Lakohi Tau Ha’u-nia Kanuru Tohar…” Featured

DILI: Xefe Governu Timor Leste, Taur Matan Ruak deklara, kazu eis Ministra Finansas Emilia Pires nu’udar responsabilidade husi parte justisa nian. Tan ne’e, nu’udar Primeiru Ministru nia lakohi atu tau nia kanuru tohar ba kestaun justisa.

PM Taur hato’o kestaun ne’e relasiona ho informasaun husi Embaixadora Timor Leste ba Portugal, Maria Paixão, ne’ebé informa katak embaixada TL iha Portugal la konsege deteta Emilia nia paradeiru.

“Asuntu ida ne’e forum justisa nian, tanba ne’e ha’u lakohi tau ha’u-nia kanuru tohar ba buat ne’ebé justiza nian,” dehan PM Taur ba jornalista sira hafoin enkontru semanál ho Prezidente Repúblika Francisco Guterres Lu Olo iha Palasiu Prezinedsiál Bairu-Pite, Dili, Kinta (07/03).

Molok ne’e tuir informasaun, Embaixada Timor-Leste iha Portugál simu karta husi Governu TL atu buka tuir paradeiru, eis-Ministra Finansas, Emília Pires, maibé sira buka la hetan tanba la rejista ona nu’udar ema timoroan.

Embaixadora TL ba Portugál, Maria Paixão, rekoñese simu karta husi Ministériu Negósiu Estranjeiru TL atu buka Emília Pires. Nune’e, embaixada monta ema atu buka iha fatin hotu-hotu, maibé la konsege hetan tanba ‘nega-aan’ hodi la rejista iha embaixada hanesan timoroan.

Timoroan hotu-hotu ne’ebé rejistu iha Embaixada hanesan timoroan, sira-nia númeru telefone, email, no diresaun rejistradu iha embaixada, nune’e fasil atu ba buka tuir.

Maibé, Emília Pires ba iha ne'ebá, Embaixadora Maria Paixão la hatene no hela iha ne’ebé mós laiha informasaun ruma.

“Nia (Emília) ba hela iha ne'ebá ne’e halo saida ne’e mós ha'u la hatene, tanba ne’e problema ninian”, dehan nia, iha Palásiu Prezidensiál, Bairru-Pité, Tersa (5/3).

Tuir nia, meius barak mak Embaixada TL iha Portugál halo atu bele hetan Emília, liu husi buka diretamente to’o hein iha Igreja, maibé sira la konsege hetan arguida ne’e.

Nia hatutan, tentativa seluk mak responsavel imigrasaun ba buka duni, la’o duni iha área balun ne’ebé ema sujere liu husi hatudu fotografia maibé ema dehan sira la koñese.

Foin lalais ne’e, iha semana kotuk, Tersa (26/2), arguida Emília Pires, la’o ‘halimar’ iha área Institutos de Registos e Notariado: Cidadãos, Campus de Justiça de Lisboa-Portugal.

Tuir informasaun ne’ebé diáriu ne’e hetan husi fonte balun husi Portugál katak, arguida Emília Pires agora daudaun hela iha Estoril-Portugál.

Antes halai, arguida Emília Pires, hetan autorizasaun husi Tribunál Munisipál Dili (TMD) ho razaun atu partisipa enkontru g7+ iha Novaiorke, iha fulan-Setembru 2016.

Tempu ne’ebá, TMD fó ba arguida Emília nia viajen ba rai li'ur durante loron 9 de'it, nune’e tenke devolve fali pasaporte ba Tribunál iha fulan-Outubru 2016 hodi asegura nafatin prosesu justisa hasoru arguida.

Maibé, hafoin to’o iha estranjeiru arguida ne’e halai lakon no la fila atu bele kontinua ninia prosesu kazu ne’ebé tama ona iha Tribunál no besik atu hetan ona sentensa.

Arguida Emília ho Madalena Hanjam, eis-Ministra Saúde, hetan akuzasaun partisipasaun ekonomia no abuzu podér iha prosesu tenderizasaun ba fornesimentu kama ba Hospital Nasionál Guido Valadares (HNGV) iha tinan 2015, ne’ebé fó prejuizu ba Estadu TL ho montante osan hamutuk $811.040.

Read 853 times
Rate this item
(0 votes)