Sábadu, 07 Dezembru 2019 | Login
LIMPEZA: Forsa - FFDTL no PNTL suru hela rai no fatuk ne'ebé monu taka metin estrada parte foho Karimbala, Segunda (30/01).  FOTO: MEDIA/MPIE LIMPEZA: Forsa - FFDTL no PNTL suru hela rai no fatuk ne'ebé monu taka metin estrada parte foho Karimbala, Segunda (30/01). FOTO: MEDIA/MPIE

Xanana ho Lere Halo Limpeza Hasees Fatuk Husi Estrada

KARIMBALA: Rai udan ne’ebé akontese durante semana ida resin iha parte foho Karimbala-Maubara, halo rai no fatuk lubuk halai taka metin estrada no baleta bee dalan.

Kondisaun ne'e difikulta movimentu transporte públiku diresaun Dili-Maliana paradu durante tempu  balun.

Ho problema ne’e, Ministru Planeamentu Investimentu Estratéjiku (MPIE), Xanana Gusmão kontaktu Komandante Jerál FALINTL-F0rsa Defeza Timor-Leste (F-FDTL), Majór Jenerál, Lere Anan Timor hodi organiza membru forsa F-FDTL, PNTL unidade BOP no  COE tun diretamente ba suru rai no muda sai fatuk boboot iha baleta no estrada laran.

Programa limpeza emerjénsia hahú hala’o iha dadeer hamoos uluk iha  estrada parte Maubara ba too foho Karimbala no Loes nian.

Durante limpeza, Lider rezisténsia na'in rua ne’e hamutuk ho forsa rua foti no muda sai fatuk boot iha estrada laran hodi muda ba ninin.

Xanana  dehan, estrada Maubara tenke hamoos beibeik, tanba movimentu boot  liu mai hosi fronteira.

Durante limpeza, Xanana organiza mós populasaun Maubara hodi taa tali tahan uza hodi suru rai iha estrada laran.

Fatin hanesan, Komandante Lere dehan, rai udan sai hanesan problema boot ida ba nasaun ne’e, tanba bainhira rai no fatuk monu taka estrada, ema liu ba mai la preokupa atu para netik karreta foti sai fatuk.

Lere dehan, posibilidade rai no fatuk sei monu taka estrada bainhira udan tuun makas liután

 “Fatuk no rai sira ne’e sei monu, se udan tun makas liután,” tenik nia.

Lere sente apresia tebes, bainhira nia maun Xanana kontaktu nian hodi organiza forsa sira tuun diretamente limpeza.

Hafoin limpeza, Xanana ba sosa katupa, ikan no naan iha merkadu Ponte Loes hodi fahe ba forsa rua ne’e han meiudia no lokraik kontinua fila fali limpeza.

Read 1799 times Last modified on Kuarta, 01 Fevereiru 2017 16:09
Rate this item
(0 votes)