Kuarta, 24 Abril 2019 | Login
Sentru Saude Sentru Saude

Komunidade Kolimau Husu Hari Sentru Saúde

BOBONARU :Komunidade husi suku Kolimau Postu Administrativu Bobonaru Munisípiu Bobonaru husu ba estadu  hari Sentru Saúde iha suku tanba iha mós enfermeiru no doutór.

Komunidade sira husi suku ne’e husu bainhira halo aprezentasaun profile suku liu husi Xefe Suku Kolimau, Armínio Guterres iha vizita  Prezidente Repúblika Taur Matan Ruak.

“Ami  nia suku seidauk iha Sentru Saúde tanba ne’e husu estadu atu harii sentru saúde tanba ami nia povu susar tebes atu  asesu sentru saúde,” dehan Armínio, iha sede suku Kolimau Segunda (06/02).

Nune’e mós Joaquim  Magalhães husu estadu atu hadi'a kondisaun estrada ne’ebé oras ne’e grave no difikulta populasaun sira susar atu lori sira nia produtu merkadu.

Prezidente Repúblika Taur Matan Ruak rekoñese preokupasaun sira ne’e, tanba kuaze iha fatin barak ema preokupa kestaun hanesan.  Maibé fiar katak Ministériu relevante sei ajuda komunidade sira atu bele responde preokupasaun hirak ne’e, maski sei lori tempu naruk.

Iha vizita ne’e, Taur Matan Ruak akompañadu ho konvidadu espesiál hanesan Xefe suku Matahoi Postu Administrativu Uatulari, Xefi Suku Abafala Postu Administrativu Kelikai, Baukau, Xefi Suku Kampung Alor Postu Administrativu Vera Kruz, Munisípiu Dili.

Komunidade sira simu  Prezidente Repúblika ho tambór, lian dadoli husi lia nain sira, Tara Tais  tuir lisan suku Kolimau nian maski udan boot.

Read 457 times
Rate this item
(0 votes)

About Author