Kinta, 18 Jullu 2019 | Login
Foos governu Timor Leste. FOTO businesstimor.blogspot.com Foos governu Timor Leste. FOTO businesstimor.blogspot.com

Folin Foos Kontinua Sa’e Makaas iha Kovalima Featured

DILI: Parlamentu Nasionál (PN) kestiona makaas folin nesesidade báziku hanesan foos kontinua sa’e iha merkadu Munisípiu Kovalima, liu-liu postu administrativu no suku sira.

Deputadu Bankada FRETILIN, Alexandrino Cardoso hateten, estrada ligasaun Munisípiu Kovalima ba Postu Administrativu Maukatar, Fatululik, Fohorem, Fatumea kondisaun grave hodi provoka folin nesesidade báziku aumenta ba beibeik.

“Tuir informasaun husi komunidade Postu Fatumean, foos ho kilograma 25 folin atinji $17 to’o $20 dolar”, dehan nia, iha Uma Fukun PN, horisehik.

Cardoso dehan, komunidade sira iha área rurál ne'ebá ekonomikamente moris kiak, susar atu hetan osan hodi sosa hahán. Tanba ne’e, Governu tenke kontrola másimu folin sasán iha merkadu atu garante folin foos ba povu ki'ik sira bele asesu.

Negosiante sira mai sosa foos iha Dili hodi fa’an tutan ba merkadu munisipál hafoin transporta ba postu administrativu no suku sira, entaun folin tenke sa’e makaas tanba sira sura kustu transportasaun nian.

Atu rezolve situasaun ne’e labele akontese beibeik, tuir Cardoso katak, governu iha obrigasaun morál tenke hadi'a kondisaun estrada no Sentru Lojístika Nasionál (CLN) tenke halo intervensaun merkadu tuir nesesidade povu nian.

Read 1242 times
Rate this item
(0 votes)