TDD kondena arguidu ho pena parseral, ba kazu oho nia feen, Maria Nunes, Arlindo hetan pena prizaun tinan 20 no ba nia subriñu Cancio, arguidu hetan pena prizaun 19, maibé tanba tribunal tetu asuntu balun, pena prizaun ne’ebé loloor tinan 39 hatun ba tinan 26.

Tuir Juiz Prosesu, TDD kondena Arlindo tama prizaun tinan 26 tanba oho nia feen no nia subriñu.

Durante hala’o prosesu julgamentu, arguidu nega. Nia dehan katak ema na’in rua ne’e mate tanba monu ba mota no bee mak dulas to’o mate. Maibé tuir testamuña sira katak, arguidu mak oho bainhira sira ba ku’u kabura iha mota laran.

Tuir kronolojia ne’ebé MP le’e sai katak, kazu ne’ebé akontese iha Munisipiu Likisa ne’e hahú bainhira arguidu ho vitima diskute-malu kona-ba osan faan ai nian.

Iha momentu ne’eba, arguidu husu osan atu ba sosa tua no nia feen foti osan $1 fó ba nia hodi ba sosa tua, maibé ladun satisfas, tan ne’e arguidu mai fila mai uma baku nia feen nia tilun-huun karuk.

Hafoin ida ne’e, arguidu ho nia feen no nia oan na’in tolu; Filmeno, Sergio no Nicolao, inklui nia subriñu Cançio no Lurdes la’o ba mota atu kuu kabura. Iha dalan, arguidu ho vitima kontinua diskute-malu.

Arguidu ne’ebé nervozu lori ai ida baku ba nia feen nia ulun, tebe iha kabun to’o monu ba bee laran. Arguidu kontinua lori fatuk tuda ba vitima iha bee laran to’o mate.

Haree ba ida ne’e, Cançio ba hasee, maibé arguidu fila hodi dulas Cancio nia kakorok to’o mate no so’e ba bee laran.

Hafoin akontesimentu ne’e, arguidu ameasa sasin sira atu labele konta sai ba ema, se lae nia sei oho hotu sira.