Jornalista diáriu ne’e husu funsionáriu sira iha PSIK nian, maibé sira hotu la hatene paradeiru husi ofisial na’in rua ne’e.

Observasaun diáriu ne’e nian iha edifísiu PSIK la konsege hetan J no T halo movimentu iha sira-nia servisu fatin.

Tuir informasaun husi fonte sira iha PSIK katak, dezde kazu ne’e akontese funsionáriu PSIK na’in rua ne’e ladún ativa ona iha servisu.

Tenta atu konfirma paradeiru funsionáriu na’in rua ne’e ba lideransa PSIK nian maibé sira laiha fatin.

Entretantu, tuir kronolojia, iha Segunda (12/2), funsionáriu PSIK na’in rua ho inisiál J no T lori karreta mini bus marka hi-lux, xoke vítima Josefa Lemos hetan tohar iha parte kotuk laran.

Rezultadu husi asidente ne’e, vítima tenke tama ba Ospitál Nasionál Guido Valadares (HNGV) hetan sofre tohar iha kanotak no ruin kotuk no mós ain-loos hetan kanek no suku pontu hitu (7).

Hafoin kazu ne’e akontese, família Josefa deside hodi levanta kazu ne’e ba tribunál hodi bele hetan justisa loloos.

“Ha’u sai vítima saugati de’it ne’e labele”, dehan vítima Josefa, iha HNGV, horisehik.

Nia hatutan, hafoin kazu ne’e akontese, Diretór PSIK hasoru malu ona ho nia diretamente, iha semana kotuk.

Diretór husu atu vítima hakarak saida prontu atu ajuda, maibé Josefa rejeita no hakarak maka hetan justisa liu husi dalan ne’ebé justu.