Membru Artemarsiais 36 ne’ebé Kaer iha Aeroportu Komoro Hetan TIR Featured

By Tomé Amado Setembru 20, 2018 6471
Ilustrasaun Artemarsiais. Foto: Kompas.com Ilustrasaun Artemarsiais. Foto: Kompas.com

DILI: Polisia Nasionál Timor Leste (PNTL) aplika Termu Identidade Rezidensia (TIR) ba membru artemarsiais na’in 36 ne’ebé hetan kaer iha aeroportu internasionál Nicolau Lobato, Dili, Segunda (17/09).

Membru grupu artemarsiais hirak ne’e, tuir informasaun, foin fila husi Indonezia no hetan kedan kapturasaun bainhira tuun husi aviaun Nam Air no Silk Air.

“Depois halo tiha identifika ba membrus 36 ne’e, PNSIK aplika kedas TIR no mós konstrui sira nu’udar arguidu,” informa Sub Xefe Servisu Investigasaun Kriminal Nasionál, Inspetor Xefe Mouzinho T. Correia ba jornalista sira iha Kuartel Jeral PNTL, Kaikoli, Tersa (18/09).

Medida ne’ebé PNSIK foti, nia dehan, tanba iha evidensia farda, sabuk, kartaun identidade no imblema artemarsiais ne’ebé sira lori iha pasta laran.

Nia dehan, kapturasaun ne’e halo bazeia ba orden husi Ministériu Públiku relasiona ho atividade ilegal tuir lei númeru 5/2017. Operasaun ne’e nu’udar operasaun konjunta ida entre PNSIK, alfandega, CSNI, no SIP.

“Ami lori sira ba Kuartel Jeral PNTL hodi halo prosesu identifikasaun hahú iha kalan maizumenus tuku 20:00 to’o tuku 02:00 (madrugada),” dehan nia.

Nia informa liu tan, membru artemarsiais ne’ebé hetan TIR sei hein prosesu tuir mai tanba evidedensia ne’ebé iha aprezenta ona ba Ministeriu Publiku.

“Sira-nia viajen ba Indonezia legal tanba iha vistu. Maibé atividade ne’ebé sira halo mak illegal,” nia esplika.

 

Rate this item
(0 votes)

Independente Digital TV