Lakohi Sunu Lilin, RDC Oho Nia Kolega “Matan-dook” Featured

By Tome Amado Outubru 31, 2018 6293
Ilustrasaun Mate Isin. FOTO: Kompas.Com Ilustrasaun Mate Isin. FOTO: Kompas.Com

DILI: Mane ida ho inisial RDC hakat ba nia kolega Jaime Gusmão Santos nia uma husu atu sunu lilin hodi haree nia dalan iha futuru. Maibé resposta husi Jaime halo RDC nervozu no halo kedan asaun krime.

Jaime nu’udar komunidade ida husi aldeia Halidolar, Suku Hera, Postu Administrativu Kristu Rei, Munisipiu Dili, durante ne’e koñesidu iha matenek natureza no bele haree ema nia futuru.

Iha Segunda (29/10) tuku 10:00 dader, RDC ne’ebé nu’udar mós Jaime nia belun di’ak, hakat ba Jaime nia uma hodi husu atu Jaime sunu lilin ba nia hodi haree nia dalan iha futuru.

Jaime hatan ba nia kolega ne’e katak nia so bele sunu lilin iha tempu kalan, la’os loron. Informa ajente polisia ida ne’ebé lakohi públika ninia identidade.

Ajente ne’e hasara mós lia-fuan ne’ebé Jaime koalia ba nia kolega RDC, “Hein lai uitoan, lalaika ansi. Ita haan tiha lai supermie ida. Depois kalan mak ha’u sunu lilin. Diak hela sa.”

Ajente ne’e dehan, vitima no suspeitu nu’udar kolega intimu ne’ebé sempre haree malu di’ak. Vitima nia uma sai mós hanesan suspeitu nia uma.

Maibé iha altura ne’ebá, hafoin vitima koalia nune’e, RDC tama ba vitima nia uma laran no lamas tudik ulun verde ida hafoin nia sai mai no sona kedan vitima husi kotuk.

Vitima monu no raan sulin. Vitima nia feen ne’ebé iha hela uma laran rona nia laen hakilar, halai sai mai haree no hakilar hodi husu ajuda ba viziñu sira.

Viziñu ne’ebé rona mai iha fatin akontesimentu no haree katak vitima nia iis kotu ona. Viziñu sira seluk no apoiu husi membru Ofisial Polisiamentu Komunitariu duni tuir suspeitu ne’ebé halai sa’e ba foho.

To’o iha foho klaran suspeitu koko atu sona tan joven ida ne’ebé ternetik nia husi oin, maibé OPS ameasa atu tiru nune’e suspeitu kontinua halai.

Bainhira halai hela, teki-teki mane katuas ida mosu husi RDC nia oin no ta’a kedan nia liman ho katana ne’ebé halo suspeitu monu kedan ba rai.

“Suspeitu monu, katuas ne’e atu hakat ba taa tan mak ha’u hakilar ‘para ona katuas, labele taa tan ona’,” dehan ajente polisia ne’e.

Hafoin, OPS ho apoiu husi komunidade sira kaer suspeitu no lori ba ospital hodi halo tratamentu ba nia kanek. Enkuantu, komunidade sira mós lori vitima ba ospital hodi hein prosesu autopsia.

Iha fatin ketak, Komandante Daruak Polisia Munisipiu Dili, Superintendenti Asistente Euclides Belo informa, suspeitu mós ho kondisaun grave tan ne’e sei halo tratamentu iha ospital.

“Ami-nia ekipa forsa rezerva hala’o hela seguransa ba nia par atu asegura suspeitu labele halai husi sala tratamentu saúde,” dehan nia iha edifisiu Komando PNTL Dili, Kaikoli, Tersa (30/10).

Euclides dehan, Servisu Investigasaun Kriminal halo ona identifikasaun ba suspeitu maibé sei hein bainhira suspeitu nia kondisaun di’ak ona foin loke prosesu.

Rate this item
(0 votes)

Independente Digital TV