Komandante Jeral PNTL, Komisariu Julio da Costa Hornai hatete, nia parte hein keixa forma husi autoridade lokal suku Nunira, postu administrativu Laga, munisipiu Baukau.
Bainhira iha keixa mak tama, Komisariu Julio dehan, nia sei orienta atu loke prosesu.
To’o ohin loron, nia hatutan, Komando Jeral so simu de’it relatoriu husi Komando PNTL Munisipiu Baukau kona-ba kazu asaltu delegasaun F-FDTL ninia konvoiu tula mate-isin saudozu Duarte.
Komisariu Julio dehan, bazeia ba relatoriu ne’ebé nia parte simu laiha agresaun fiziku hasoru populasaun na’in hitu ne’ebé kaptura.
“Ha’u esplika tuir buat ne’ebé mak sira informa mai ha’u, laiha agresaun fiziku ida mak mak ha’u-nia membrus iha eskuadra Laga halo ba Xefe Suku Nunira ho nia populasaun na’in 7,” dehan Julio.
Entretantu, molok ne’e Xefe Suku Nunira Nilton Gama duun polisia eskuadra Laga halo agresaun hasoru nia no nia komunidade na’in 7.
Xefe Suku Nunira hamutuk ho nia komunidade na’in hitu ne’ebé hetan baku husi membru PNTL eskuadra Laga hakat mai Dili hodi hala’o tratamentu saúde iha ospital nasionál no hato’o mós keixa ba Komando Jeral PNTL.
Bainhira hasoru-malu ho jornalista Jornal INDEPENDENTE, Xefe Suku ne’e konta kona-ba akontesimentu ne’ebé akontese iha altura ne’ebá.
Tuir Xefe Suku ne’e, nia ho nia komunidade na’in hitu laiha koñesimentu ba kazu asalta ba delegasaun F-FDTL iha 5 Outubru liu ba.
Nilton konta, iha Sesta (05/10) tuku 12:00 kalan, nia rona asu hatenu no bainhira nia sai mai li’ur nia haree membru polisia hamutuk ho membru F-FDTL hakat mai iha ninia rezidensia.
Hafoin komprimenta, polisia no forsa sira informa ba nia katak sira kaptura ona komunidade na’in hitu (7) tan ne’e presiza prezensa husi Xefe Suku hodi identifika ema sira ne’e nu’udar komunidade Suku Nunira ka lae.
Ho nune’e, nia deside hodi hamutuk ho membru forsa seguransa ba Igreja oin, fatin ne’ebé ema na’in hitu ne’e iha, no forsa sira husu Xefe Suku koñese ema sira ne’e ka lae.
“Sim, ha’u hatene. Sira mesak ha’u-nia populasaun, balun ha’u-nia alin, balun ha’u-nia tiun no balun ha’u-nia maun,” Nilton hasara lia-fuan ne’ebé nia koalia iha altura ne’ebá.
Hafoin ida ne’e, polisia haruka nia sa’e karreta hodi ba eskuadra polisia Laga nian. Bainhira to’o iha ne’ebá no foin tama ba sala laran membru polisia lubuk ida iha Eskuadra laran baku, tuku no tebe ema na’in hitu to’o monu ba rai.
Baku hotu tiha, polisia sira haruka katuas na’in 3 tuur ketak no joven na’in 4 tuur ketak, hafoin sira bolu Xefe Suku tama ba laran.
“Ha’u hatama ba sira la husu tan buat ida pesoal polisia ida ho inisial ZLV tebe kedas ha’u-nia knosen sorin halo ha’u monu kedas ba rai. Sira hada’u hotu ha’u-nia telemovel. Maibé membrus forsa ida mak kaer fali ha’u-nia liman, haruka ha’u tuur iha kadeira,” dehan Xefe Suku ne’e.
Hotu tiha ida ne’e, Xefe Suku dehan, polisia sira hatete ba komunidade na’in hitu katak sira atu lori Xefe Suku ba Polisia Militar. Molok lori sai Xefe Suku, sira haruka ema na’in hitu ne’e hasai hotu sira-nia roupa hafoin hatama sira ba sela laran.
“Ha’u sei asiste, sira haruka ha’u-nia populasaun na’in hitu ne’e hasai hotu roupa, depois sira hatama tiha ba sela laran,” dehan nia.
Polisia sira tula Nilton, la’os ba kuartel PM, maibé ba haree bus ida iha Laivai ne’ebé ho kondisaun vidru odamatan rahun.
Tuir Nilton, nia hakfodak bainhira haree kondisaun karreta tanba nia laiha iha koñesimentu no la simu informasaun ruma kona-ba akontesesementu asalta delegasaun F-FDTL. Sa tan distansia husi ninia uma iha Soba ba Buigira, fatin kazu ne’e akontese, kuaze kilometru neen (6).
