Komisariu Julio: Feto Lalika La’o Kalan Featured

By Husi: Cristina Ximenes Setembru 21, 2018 7270
Ilustrasaun feto sai kalan. FOTO: cerpen.co.id Ilustrasaun feto sai kalan. FOTO: cerpen.co.id

DILI:Kazu oho hasoru Vera Carvalho Martins tenke sai lisaun ba inan-aman hotu iha Timor Leste atu kontrola didi’ak sira-nia oan-feto bainhira atu sai ba fatin ruma.

Deklarasaun ne’e hato’o husi Komandante Polisia Nasionál Timor Leste (PNTL), Komisariu Julio da Costa Hornai.

“Ba alin feto sira, ha’u husu ba ita hotu, ba inan-aman sira, atu bele kontrola mós oan-feto sira ne’ebé iha eskola sekundária ka universidade atu bele la’o. Limite ninia lala’ok. Bainhira ita iha namoradu ruma karik atu husu ita la’o hamutuk ba fatin ruma tenke atensaun,” apela Komisariu Julio liu husi intervista ho jornalista sira hafoin enkontru semanál ho Prezidente Repúblika iha Palasiu Prezidensiál Bairu-Pite, Dili, Kinta (20/09).

Tanba, nia dehan, kazu barak mak mosu tanba problema entre namora ne’ebé ikus mai hamosu kazu krime.

Tan ne’e, nia hatete, nu’udar feto tenke mós asegura ninia dignidade no inan-aman mós tenke tau-matan ba oan-feto sira ninia lala’ok.

“Ba ne’ebé tenke hatene,” dehan nia.

Ba tempu agora, Julio dehan, fasil tebes atu informa ba malu liu husi telemovel bainhira hakarak ba fatin ida.

“Karik la’o mesak di’ak liu lalika. Karik mane ruma ka namoradu ruma husu atu la’o mesak kalan, di’ak liu prevene, lalika. Hakarak saida karik iha loron, labele la’o kalan,” nia husu.

Tanba, Komisariu ne’e dehan, bainhira la’o kalan iha tentativa barak, bele mós mosu violensia no bele akontese mós krime seluk.

Kazu Oho Hahú Buras

Entretantu, Komisariu Julio hatete, iha enkontru ho prezidente nia parte informa kona-ba situasaun seguransa einjeral no kazu krime ne’ebé hahú buras.

“Ami mai informa situasaun jerál ba Prezidente Repúblika katak situasaun la’o hakmatek, laiha kazu ida ne’ebé signifikante tebe-tebes ka boot... maibé ami informa ba Prezidente Repúblika kona-ba kazu krime sira ne’ebé agora ne’e buras,” dehan Komisariu Julio.

Iha fulan ne’e nia laran, komunidade sira hakfodak ho kazu oho ne’ebé akontese hasoru Vera no kazu sona mate foin-sa’e ida iha Hera.

Ba kazu Vera nian, Komisariu Julio dehan, suspeitu na’in haat tama ona prizaun preventiva, no daudauk ne’e hein rezultadu teste DNA atu justifika loloos identidade husi mate-isin ne’ebé kee iha Subaun Kiik, Munisipiu Manatuto.

Ba kazu iha Hera, nia dehan, prosesu rejistu ona iha Ministériu Públiku (MP) no hein de’it delegasaun hodi hala’o prosesu investigasaun kle’an liu tan.

Ba kazu rua ne’e, nia dehan, nu’udar aman ba nasaun Prezidente Repúblika Francisco Guterres ‘Lu Olo’ sente triste tebtebes.

“La’os Prezidente Repúblika mesak triste maibé ema hotu triste bainhira rona situasaun sira husi joven Timór sira. Hahalok ida ne’e tuir lolo’os labele (akontese),” deklara nia.

Rate this item
(0 votes)

Independente Digital TV