Tuir informasaun joven ne’ebé identifika ho naran Carlos da Costa ne’e hetan sona iha kabun hafoin koko salva labarik feto ida ho idade tinan 12 ho inisial BMPT husi violasaun seksual.

Iha Domingu maizumenus tuku 03:00 madrugada, Carlos ne’ebé foin fila husi festa kazamentu ida haree mane ida halo agresaun fiziku hasoru labarik feto no koko atu halo violasaun seksual hasoru labarik ne’e.

La hanoin barak, Carlos halai ba hodi koko atu salva labarik feto ne’e, maibé mane dezkoñesidu losu tudik husi nia kanotak no sona Carlos nia kabun.

Hafoin hetan sona Carlos kaer nia kabun hodi tahan raan ne’ebé sulin. Vitima BMPT hakilar maka’as liu tan hodi bolu ema atu mai ajuda.

“Ha’u hakilar atu komunidade bele mai ajuda. Maibé ema to’o mai Carlos husik iis tiha ona,” dehan vitima BMPT ne’ebé hasaran husi polisia.

Vitima BMPT daudauk ne’e hala’o hela tratamentu iha ospital nasionál Guido Valadares hodi observa ninia kondisaun saúde.

Komandante Daruak Polisia Nasionál Timor Leste (PNTL) Munisipiu Dili, Susperintendente Asistente Euclidis Belo informa, hafoin sona vitima suspeitu halai husi fatin akontesimentu.

Nia hatutan, daudauk ne’e Servisu Investigasaun Kriminal PNTL Dili seidauk bele rekola informasaun detallu kona-ba suspeitu. Maibé Komando garante katak tempu badak sei kaptura.

“Agora dadaun ita seidauk identifika suspeitu tanba ita presiza informasaun husi alin-feto ne’ebé sai vitima. Nia sei halo hela tratamentu (iha ospital), kuandu parte ospital garante ona ninia kondisaun, ita sei rekola informasaun husi nia,” dehan Euclidis.

Daudauk ne’e mate isin iha hela mortuariu ospital nasionál no PNTL Dili hato’o ona pedidiu ba Ministériu Públiku (MP) hodi husu autorizasaun atu hetan lisensa ba autopsia.