Iha Sabadu (27/10/2018), maizumenus tuku 17:00, iha aldeia Marigi, Suku Katrai Leten, Postu Administrativu Letefoho, Munisipiu Ermera, maun ho inisial CAS taa mate nia alin rasik.
Tuir informasaun husi familia, Pedro hetan taa husi nia maun CAS tanba projetu bee-moos husi ajensia internasionál ida.
Ajensia ne’e entrega projetu kanalizasaun bee-moos ba eskola Baziku Katrai Leten hodi bele kanaliza ba eskola refere no ba komunidade sira. Parte eskola deside hodi entrega ba Pedro ne’ebé mós sai nu’udar Adjuntu Diretór eskola refere.
Ho konfiansa ne’e, Pedro hahú harii projetu tanki bee-moos iha nia maun ninia rai.
Maibé, intesaun di’ak husi Pedro la hetan apoiu husi nia maun. Bainhira projetu ne’e remata, CAS hahú halo reasaun tanba konsidera nia alin harii tanki bee-moos iha nia rai la ho ninia koñesimentu.
Iha Sabadu lokraik, Pedro ho ninia inisiativa di’ak hakat ba CAS nia uma hodi husu atu CAS bele akompaña nia hodi ba haree tanki ne’ebé harii ona.
Maibé, CAS ne’ebé nervozu sai husi uma ho katana no taa kedan nia alin. CAS ho sadiku taa Pedro nia ulun, kakorok, kotuk-laran no liman kabuk.
“Ha’u-nia apa mate fatin tanba raan sai barak,” dehan Pedro nia oan hakiak, Denis Soarés dos Santos iha ospital nasionál Guido Valadares, Dili, Segunda (29/10).
Pedro ho nia feen la konsege hetan oan. Tan ne’e, sira foti no hakiak CAS nia oan-mane.
Oan hakiak ne’e hatete, loloos rai ne’ebé hamosu problema ne’e vitima nia propriedade, maibé vitima ne’ebé laiha oan fó ba nia maun atu bele dezenvolve hodi haree nia oan sira.
Iha fatin hanesan, Pedro nia feen, Aquelina Soares dehan nia hakarak atu kazu ne’e tenke lao tuir dalan justisa.
Entretantu, suspeitu dadaun detein ona iha sela komando Polisia Munisipiu Ermera hodi submete ba oprosesu investigasaun.
Aleinde ne’e, mate-isin Pedro iha ona mortuariu ONGV, Bidau, Dili, hodi hein prosesu autopsia.
