Hakoak Sala Feto, Mane Ida Tama Tribunal Featured

By Martinha Gusmao Setembru 06, 2018 6910
Ilustrasaun tama kuartu. FOTO: Pantau.com Ilustrasaun tama kuartu. FOTO: Pantau.com

DILI: Sorte aat ba Toke (la’os naran loos) ne’ebé tenke ba hataan iha Tribunal tanba hakoak sala feto ne’ebé nia hanoin nu’udar nia doben.

Istoria hahú bainhira Toke ne’ebé simu mensajen husi nia doben Bui (la’os naran loos) tama ba Bui nia kuartu. Tanba kondisaun nakukun, Toke latan iha kama leten no hahú hakoak feto ida ne’ebé toba hela.

Sorte aat, tanba feto ne’ebé nia hakoak hakilar. Ho hakfodak, Toke ne’ebé hahú konsiente katak feto ne’e la’os nia doben hadeer no koko atu halai sai ba li’ur, maibé feto ne’e nia primu hamrik ona iha odamatan oin.

Toke labele halo buat ida bainhira feto ne’e nia primu ne’ebé deskonfia Toke koko halo violasaun seksual hasoru nia prima hahú halo agresaun fiziku.

Hafoin kazu ne’e lori ba Tribunal Distrital Dili (TDD) hodi hala’o julgamentu, ikus mai TDD deside absolve Toke husi kazu tentiva violasaun seksual hasoru vitima ho inisial N, tanba Tribunál la nota asaun husi krime tentativa ida ne’e.

Tuir Juiz prosesu, tuir faktus ne’ebé iha hatudu katak iha 3 to’o 6 Janeiru 2013 vitima N ba toba iha nia prima Bui nia uma.

Iha kalan ida Bui (A) ba festa no vitima hela mesak iha uma. Iha momentu ne’e, arguidu Toke tama ba kuartu laran, latan iha kama hodi hakoak vitima.

Arguidu deklara ba tribunál katak, iha momentu ne’ebá nia laiha intensaun atu halo violasaun seksual ba vitima. Nia simu mensajen husi vitima nia prima ne’ebé iha relasaun ho namora no sempre halo relasaun privadu.

“A haruka mensajen ba arguidu antes A ba festa, arguidu ba uma, tanba hatene ahi mate, entaun arguidu mós tama kuartu, toba no hakoak, hanoin A mak toba maibé la’os,” deklara juiz.

Vitima mós deklara ba tribunál katak, arguidu hakoak de’it no la halo relasaun ho vitima.

Husi sirkumstansia hirak ne’e Tribunal intende katak loos duni arguidu laiha intensaun tanba momentu ne’e arguidu hanoin katak arguidu nia namorada A mak toba, maibé laos, no iha momentu ne’ebá vitima sira-nia ahi mate.

“Kuartu ne’ebé vitima toba mós A nia kuartu, ikus liu A mak telefone no SMS arguidu atu ba hamutuk ho A iha uma, maibé arguidu ba vitima N mak toba, A ba festa,” esplika juiz.

Tan ne’e, tribunal deside absolve arguidu husi krime tentativa violasaun seksual tuir artigu 172 konjuga ho artigu 23 no 24 kodigu penal Timor Leste.

Rate this item
(0 votes)

Independente Digital TV