Stock Foos iha Armazein Governu Menus Featured

By Ligia Noronha Marsu 21, 2018 1158
Fos MTCI Fos MTCI

DILI: Stock foos oras ne’e daudaun komesa menus ona iha armazein governu. Tuir dadus husi Sentru Lojístika Nasionál (CLN) iha armazein 02 nian hela tonelada 800.

Prezidente CLN, Augusto Júnior Trindade hatete, informasaun ne’ebé sira hetan folin foos iha merkadu rurál hahú sa'e.

Ne’e duni, dezde fulan-Dezembru 2017 to’o Marsu 2018, CLN halo ona intervensaun iha merkadu. Foos ne’ebé hasai husi armazein hamutuk tonelada 1.800. Ne’e duni, stock foos iha armazein mós hahú menus ona.

Nia hatete, durante ne’e CLN iha ekipa ida tun ba halo inspesaun iha merkadu. Sira nota presu foos oras daudauk sa'e makaas. Fatin hirak ne’e maka hanesan Lospalos, Laklubar, Ermera, Manufahi no fatin seluk tan.

Ami identifika foos ho kilograma 25 antes ne’e ho presu $12 agora sa'e ba $19, iha Dili ita haree foos folsom antes ne’e’ fa'an ho presu $12.50 agora sa'e ba $16”, tenik nia.

Iha fulan Marsu ne’e nia laran, CLN halo planu liu husi intervensaun merkadu ho tonelada 120, ne’ebé sei halo iha Munisípiu Suai no Ermera.

Nune’e, ba selebrasaun festa Páskua nian, prepara ona tonelada 70 atu halo intervensaun iha merkadu.

Intervensaun ne’ebé CLN hala'o daudauk ne’e ba Munisípiu Ermera, Manufahi, Bobonaru, Likisá, Vikeke. Fatin hirak ne’e hetan intervensaun hafoin hetan proposta husi komunidade sira.

Rate this item
(0 votes)

Independente Digital TV