Print this page

Importasaun Sasán Hahú Menus Featured

By Artur da Luz Agostu 13, 2018 7451
Diretór Jerál Alfándega, José Abílio Lima Diretór Jerál Alfándega, José Abílio Lima

DILI: Impase polítika ne’ebé la’o ona iha Timor-Leste durante tinan ida fó impaktu makaas ba ekonomia rai laran. Tranzasaun osan ne’ebé menus afeta mós ba volume importasaun tuun.

Volume importasaun ne'ebé tun bele haree husi valór reseita importasaun ne’ebé tama iha Alfándega. Iha 2014 totál taxa ne’ebé hatama ba kofre Estadu tokon $ 67, iha 2015 tokon $66, iha 2017 tokon $75, maibé iha 2018 foin mak to’o millaun $34.

Sé ita kompara ho tinan kotuk to’o fulan hanesan ne’e, ami entrega ona taxa ba kofre Estadu kuaze tokon $45-resin”, dehan Diretór Jerál Alfándega, José Abílio Lima, iha edifísiu Alfándega, Kolmera-Dili, horisehik.

Nia hatutan, impase polítika implika boot iha volume importasaun sasán. Importadór sira haruka sasán mai TL hahú menus iha tinan ne’e.

Nia hatutan, to’o oras ne’e ró sira ne’ebé lori sasán para iha Portu Dili hahú menus kompara ho tinan kotuk, haree ba kestaun ne’e bele nota katak importadór sira menus.

Nune’e, reseita ne’ebé menus afeta mós husi importadór sira hatama tabaku mós tenke sukat, tanba kumpre orientasaun husi Ministériu Saúde. Ne’e duni tenke kontrolu no importasaun husi serveja HEINEKEN mak kompeténsia hatama tua.

Entretantu, Abílio esplika, daudaun ne’e volume importasaun ba atividade sasán ilegál iha fronteira hahú aas, tanba Alfándega servisu koordenasaun ho F-FDTL konsege prende mina rai tonelada 10, nune’e iha loron tuir mai ekipa konjuntu prende tan mina rai tonelada 5 iha Atabae.

Nia dehan, bainhira Alfándega ho F-FDTL prende, mina-rai hirak ne’e entrega ba Komandu PNTL Munisípiu Bobonaru hodi loke prosesu investigasaun.

Ita haree ba situasaun sira ne’e volume importasaun ilegál iha fronteira sa’e maka'as”, dehan Abílio

Maski nune’e, Alfándega sei kontinua koordena ho F-FDTL halo kontrolu iha fronteira rai maran no mós iha portu sira hodi impede movimentu importasaun sasán ilegál.

Rate this item
(0 votes)