Tuir lei, ANPM iha autoridade tomak teknikamente hodi kontrolu setór downstream iha Timor-Leste. 

Prezidente ANPM, Gualdino do Carmo da Silva hateten, ba ohin ANPM sei regula teknikamente ba komersializasaun kombustivel no mós ba iha librikante sira.

“Ita sei regula operadór sira ne'ebé importa mina mai iha rai laran, entaun ita presiza tenke regula,” dehan nia, iha salaun JL Vila Ai-Mutin, horisehik. 

Nia dehan, prosesu atu regula empregador sira ne’e, ba dahuluk ANPM sei fo lisensa ba sira, depois hetan lisensa importa kombustivel tama mai, sira mós tenke hetan lisensa husu autorizasaun. 

ANPM husu sira tenke ba halo tranzasaun, tanba tenke konfirma sira nia produtu sira ne’e mai husi ne'ebé, presiza hatene nia kualidade ne'ebé nia lori ne’e. 

Aleinde ne’e, kona-ba dokumentu ró nian tenke iha asuransi, depois maka ANPM halo tranzasaun hodi haruka mina mai timor. Kuandu ró tula mina sira ne’e too ona iha timor foin ba halo verifikasaun entre ANPM ho Alfándega hodi haree kuantidade produtu importasaun.

“Kuandu dokumentu ró no kuantidade sasán la han malu ne’e ita rejeita, atu sira bele halo kompleta hotu ona ita foin hatún mina sira ne’e,” dehan Gualdino.

Iha fatin hanesan, Diretór Ezekutivu SERVE, Florêncio Sanches hateten, kona-ba lisensiamentu ne'ebé empregador sira fo liu husi ANPM, ne’e lisensiamentu tékniku operasionál, maibé lisensa komersiál SERVE sei nafatin, tanba iha ligasaun ba dekretu primeiru lei 45/2011 kona-ba padraun interasaun ne'ebé TL nu'udar nasaun adopta ona implementa, daruak dekretu lei N0 7/2006 kona-ba kódigu komersiál, datoluk maka dekretu lei N0 24/2011 kona-ba liensiamentu komersiál. 

“Tanba ne’e, ha'u ko'alia ona ba tékniku operasaun nian klaru sira tenke fó, maibé ba non operasionál nian tenke ba uluk iha SERVE, tanba iha lei hatete atividade ekonómiku hotu iha TL tenke hetan legalidade uluk,” hatete Sanches.

Nia esplika, hetan legalidade uluk ne’e maka tenke identidade legál, identidade legál katak, tenke provas ho sertifikadu komersiál.

Tanba ne’e, kuandu sira hetan ona sertidaun komersiál hetan hotu tiha foin bele halo negósiu, mezmu sira halo lisensa komersiál entaun sira tenke lori sertidaun sira ne’e ba iha ANPM depois hasai tiha sertidaun lisensiamentu kona-ba operadór nian foin maka bele sira halo negósiu.