Atake ikus liu akontese hafoin Izraél lansa atake aéreu sira hasoru área sira ne'ebé kontrola husi Hezbollah iha Beirute iha madrugada Segunda-feira, 2 Marsu.

Tuir relatóriu husi Politiku, atake Izraél nian iha Beirute hamate ema na'in 31 no hakanek na'in 149, sita husi Ministériu Saúde libanés.

Informasaun hanesan fó sai mós hosi media Al Jazeera, ne'ebé fó sai katak aviaun Izraél sira halo bombardeamentu ba kapitál libanés hafoin Hezbollah afirma katak lansa roket sira no drone sira iha baze militár ida iha Haifa, iha norte Izraél nian.

Hezbollah afirma katak nia atake hanesan retaliasaun ba omisídiu husi líder supremu iraun, Ayatollah Ali Khamenei, iha atake aéreu ida husi Estadus Unidus Amerika no Izraél, iha sábadu liubá.

Iha ninia deklarasaun ofisiál, Hezbollah hatete, "Lideransa rezisténsia nian sempre afirma katak kontinuasaun husi agresaun Izraél nian no asasinatu ba ami nia líder sira, foin-sa'e sira, no povu fó direitu ba ami atu defende ami nia an no hatán iha tempu no fatin ne'ebé apropriadu."

Sira mós afirma katak Izraél labele kontinua nia agresaun durante fulan 15 lahó resposta alerta ida hodi hapara atake sira no retira husi teritóriu libanés okupadu.

Ministru Defeza Izraél Ameasa

Ministru Defeza Israel nian, Israel Katz, hatete katak Hezbollah sei selu "folin ne'ebé maka'as" ba atake ruma hasoru Izraél.

Nia mós nomeia Sekretáriu-Jerál Hezbollah nian Naim Qassem hanesan alvu ida ne'ebé marka ona ba asasinatu.

Iha informasaun ida iha plataforma X, Katz hakerek, "Ema ne'ebé maka tuir Khamenei nia dalan sei hetan sira-nia an iha infernu nia klean hamutuk ho elementu hotu-hotu husi eixu aat ne'ebé maka lakon."

Militár Izraél nian deklara katak sira ataka hela Hezbollah iha Líbanu tomak.

Iha deklarasaun ida, militár hatete, "Militár Izraél sei atua hasoru Hezbollah nia desizaun atu tama iha kampaña ida-ne'e, no sei la permite ida-ne'e atu sai ameasa ba Israel no prejudika povu rejiaun norte nian."

Sira mós hatete katak sira alvu ona membru seniór ida hosi Hezbollah iha Beirute no figura xave ida iha súl Líbanu nian, lahó espesifika nia identidade.

Izraél fó sai alerta evakuasaun nian ba rezidente sira hosi aldeia liu 50 iha súl Líbanu nian no iha Vale Bekaa, inklui Bint Jbeil, hodi hadook pelumenus kilómetru ida husi alvu ne'ebé deskonfia.

Iha tempu hanesan, Iraun tuir informasaun lansa atake drone ida hasoru instalasaun Ras Tanura Aramco Saudita nian iha Arábia Saudita. Atake ne'e obriga refinaria petróleu boot liu iha rejiaun ne'e hodi hapara produsaun temporáriu enkuantu avalia hela estragu sira.

Maibé, Iraun nega katak nia halo ataka ba refinaria petrolífera.

Maski iha eskalasaun, Sekretáriu Defeza EUA nian, Pete Hegseth, rejeita preokupasaun sira katak atake ida hasoru Iraun sei hamosu funu ida ne'ebé prolongadu.

Iha enkontru Pentágonu nian, nia hatete, "Ida-ne'e la'ós Irake. Ida-ne'e la'ós rohan-laek. Ida-ne'e kontráriu tebes."

Entretantu, Prezidente norte-amerikanu, Donald Trump, hatete ona katak operasaun militár ida hasoru Iraun bele dura loron barak.