Primeiru-Ministru hala’o vizita bá Liurai Jogjakarta ne’e bainhira partisipa ajenda negosiasaun da-ruak bá Fronteira Maritima entre Timor-Leste ho Indonézia.

“Priveleiju ida bá ha’u. Ida-ne’e nu’udar ha’u-nia prezensa da-huluk iha Jogjakarta. Buat ida ne’ebé halo ha’u senti hakfodak maka foin hatene istória kona-bá Jogjakarta, hafoin hasoru-malu ho Sri Sultan. Antes ne’e ha’u rona de’it mak naran Jogjakarta, ne’ebé buat ne’ebé halo ha’u hakarak tebes atu mai maka Borobudur ne’ebé besik Jogjakarta maibé la hatene ninia diferensa únika entre Jogjakarta ho Provínsia sira seluk,” dehan PM Xanana liu husi Komunikadu ne'ebé online INDEPENDENTE asesu iha Pájina ofisiál Primeiru-Ministru Kay Rala Xanana Gusmão, Tersa (09/12).

PM Xanana sente ondradu tebes tanba hasoru-malu ho Sri Sultan hodi bele koa’lia bá malu no bele komprende di’ak liu-tán, hatene diferensa únika iha Indonézia ne’ebé ho ninia illa ki’ik-oan barak tebtebes.

Biban hanesan, Sri Sultan Hamengkubuwono X agradese bá Primeiru-Ministru tanba bele iha biban hodi hala’o vizita mai Jogjakarta.

“Ami na’in-rua ko’alia oitoan kona-bá istória Jogjakarta nian. Loos duni, katak ita presiza fó hanoin bá malu hodi hadi’a ita-nia nasaun. Ha’u espera ho vizita ne’e ita-nia relasaun sei di’ak liu-tán tanba timoroan barak mós estuda iha Jogja,” Liurai ne’e afirma.

Entretantu, akompaña Primeiru-Ministru iha vizita ne’e maka, Embaixadór Timor-Leste iha Indonézia, Roberto Soares no Embaixadór Indonézia iha TL, Octo Dorinus Manik.