Print this page

Alkatiri husu PR Horta Estuda Didi’ak Konstituisaun Featured

By Aquino Gomes Abril 26, 2023 1200
Sekretáriu Jerál Partidu Fretilin, Marí Alkatiri. Foto:INDEPENDENTE. Sekretáriu Jerál Partidu Fretilin, Marí Alkatiri. Foto:INDEPENDENTE.

ATAÚRO: Sekretáriu Jerál Partidu Fretilin, Marí Alkatiri, husu ba Prezidente Repúblika, José Ramos Horta, atu estuda didi’ak Konstituisaun Repúblika Demokratika Timor Leste, nune’e labele foti desizaun ne’ebé sees husi Konstituisaun.

Alkatiri hato’o kestaun ne’e relasiona ho deklarasaun husi Prezidente Repúblika (PR) Horta, katak mak sei fó pose ka la fó pose ba Primeiru Ministru foun.

"Mai ha’u hanoin Prezidente (Repúblika) mak koalia hanesan ne'e duni, iha buat rua: primeiro, di’ak liu tenke estuda didi’ak. Segundu, tanba hatene ona katak Fretilin mak atu manan no bainhira plaforma mak manan situasaun repete Prezidente Repúblika sesante, Francisco Guterres ‘Lú Olo’ uluk,” dehan Alkatiri iha Kampu Vila Maumeta, Aldeia Ilimanu, Suku Vila Maumeta, Munisípiu Ataúru, Tersa (25/04).

Maske nune’e, nia hatutan, iha momentu ne’ebá PR Lú Olo fó pose ba Primeiru Ministru.

"Se uluk sira kritika Prezidente Lú Olo, sira labele fali agora halo saida mak sira uluk hanoin dehan la loos, eradu, fora husi konstituisaun."

“Prezidente la'ós nain ba rai ida ne'e, Prezidente laiha ema ida ke hakarak ida mesak deit sai nain ba rai ida ne'e. Konstituisaun ne'e klaru, maioritariu mak indizita Primeiru Ministru, la dehan katak Prezidente bele eskolla Primeiru Ministru," katak nia.

Nia konta, uluk Xanana halo ida ne'e, kuandu Prezidente atuál sai Primeiru Ministru iha Governu daruak, Xanana mak konsolida, ne'e sala ona.

"Uluk Prezidente Lú la halo ida ne'e, uluk Lú fo pose ba Primeiru Ministru Taur Matan Ruak. Ikus fali mai, maibé Prezidente Lú rasik la pose ba sira nain hirak tuir mai, nain hitu tan."

Alkatiri hatete, nia la simu tanba nia solidariedade, no nia rasik hanesan Sekretáriu Jerál halo deklarasaun katak nia mak Prezidente Republika karik fó pose ona.

"Signifika ha’u mós la konkorda ho saida mak Prezidente Lú halo, ne'e mak realidade,  se la loos, dehan la loos. La'ós dehan loos ka la'ós, ne'e depende ba ema mak deside katak desizaun ne'e loos ka la loos."

“Atu dehan de’it ba Prezidente estuda didi’ak konstituisaun hanesan novel da paz, labele sai fali autor ba krize ka promotor ba krize. Laiha balas ba, balas mai,  konstituisaun uluk, sira dehan Prezidente Lú furador konstituisaun, entaun nia laos dehan fali furador maun CNRT sira nian," nia hatete.

Molok ne'e, Prezidente Repúblika, José Ramos Horta hatete, sei haree Primeiru Ministru ne'ebé mak partidu maioria aprezenta hodi simu pose.

"Ha'u mak sei fó posse ka la fó posse ba Primeiru Ministru. Ha'u mak fó posse ka la fó posse ba koligasaun ruma. Ha'u mak fó posse ka la fó posse ba Ministru sira. Se líder ida ka kandidatu ida, ha'u haree ko'alia mamuk loos, la ko'alia buat ida no la fó garantia ba ha'u, partidu ne'e ba governu bele kontribui ba dame, haklean demokrásia, ha'u bele la fó posse, ne'e mak ha'u aviza," dehan PR Horta, Sábadu (22/04).

Rate this item
(0 votes)
Last modified on Kuarta, 26 Abril 2023 23:47

Related items